Maamulka Afgooye oo ka hadlay khasaaraha weerarkii Al Shabaab
-
- Posted On 19-10-2016, 01:46PM
AFGOOYE, Somalia- Guddoomiyaha degmada Afgooye ee gobolka Shabeellaha hoose, ayaa faah faahin ka bixiyay khasaaraha dhinaca dowladda kasoo gaaray, weerar shalay galinkii dambe kooxda Al Shabaab halkaasi ka gaysatay.
Cabdinaasir Caalim Ibraahim, oo waraysi gaar ah siiyay Radio Garowe, ayaa sheegay in xaaladda Afgooye tahay mid dagan islamarkaana gacanta ugu jirto dowladda Somalia, wuxuuna sheegay inaysan mar dambe suuro galin karin in Al Shabaab gudaha usoo gasho.
Caalim, ayaa sidoo kale tilmaamay in dagaalkaasi ku dhinteen mas'uuliyiin iyo saraakiil katirsan dowladda Somalia isagoo xusay inay kamid ahaayeen; Isu duwihii wasaaradda maaliyadda ee degmada Afgooye, Taliyaha qaybta gobolka ee ciidanka Asluubta Somalia, taliye ku-xigeen katirsan ciidanka daraawiishta dalka iyo shan qof oo shacab ah.
Wuxuu tilmaamay in weerarkaasi ahaa mid aan la filan islamarkaana, isagoo tilmaamay in hadda amniga la xoojiyay oo ciidamo badan duleedka degmada iyo gudaha la keenay.
Guddoomiyaha ayaa sidoo kale xusay inay ka go'antahay sidii ay mar walba uga hortagi lahaayeen weerarada kooxda Al Shabaab oo sida uu xusay ah dad kasoo horjeeda maslaxadda umadda Somaaliyeed.
Hadalka Guddoomiyaha degmada Afgooye, ayaa yimid xilli ciidamada dowladdu dib ugala wareegeen kooxda Al Shabaab kadib saacado kooban oo ay gacanta ku haysay iyagoo xoog iyo weeraro kusoo galay.
GAROWEONLINE
