Maareeye oo laga codsadey in uu raallingelin siiyo Somaliland

MUQDISHO, Soomaaliya – Xildhibaan Xuseen Carab Ciise oo ka tirsan Aqalka Hoose ee baarlamaanka Soomaaliya ayaa si adag u dhaleeceeyay hadalkii uu Wasiirka Warfaafinta xukuumada federaalka ku duray Somaliland.

Maxamed Cabdi Xayir [Maareeye] oo warbaahinta kula hadlay magaaladda Muqdisho, ayaa sheegay in Somaliland ay 28-sano ku dhaqmeyso "hal siyaasad oo fadhiid ah isla markaana ka timaadda marfishyadda qaadka].

Hadalka Maareeye ayaa yimid iyadoo uu jiray guux ku saabsan in madaxweyne Farmaajo uu tegayo Hargeysa, taasoo ugu dambeyntii la beeniyey.

Sharci-dejiye Xuseen oo wax laga xumaado ku tilmaamay dhawaqa wasiir Maareeye ayaa ku waaniyey "in uu si furan raalligelin kaga bixiyo".

"Runtii waa arrin aad looga xumaaday, waa arrin runtii u baahan in uu ka bixiyo cudurdaar, raalin weynna uu ka siiyo shacabka Soomaaliyeed," ayuu u sheegay Telefishinka maxaliga ah ee Universal.

Wasiirkii hore ee gaashaandhiga dowladii Sheekh Shariif ayaa xusay in Maareeye uu "sharaf darro iyo magac xumo uu u soo jeediyey gobolada uu metelo".

"Laakiin wuxuu u hadlayay siddii nin xukuumadda afhayeen u ah, wuuna yahay, laakiin ma ahayn nin Soomaaliya oo dhan u hadlaayey," ayuu tibaaxay, isagoo ku nuux-nuux saday baahida loo qabo in Maareeye uu raali gelin bixiyo.

Ka sokow in ay kawada tirsan yihiin goleyaasha xeer-dejinta waddanka, Maareeye iyo Xuseen ayaa kasoo jeeda gobolada waqooyi ee Soomaaliya, oo loogu yeero Somaliland isla markaana gooni u goosad ah tan iyo 1991-dii.

Dowladda uu hogaamiyo Farmaajo oo ku guuldareystay in ay qaado talaabooyin dhabaha u xaaraya in dib loo bilaabo wadahadalka Soomaaliya iyo Somaliland ayaa waxaa lagu dhaliilay siyaasadeeda "gurracan" ee maamulkaas.

MUUQAALKA XILDHIBAANKA

GAROWE ONLINE