Madaxweynaha Puntland oo uga mahadcelisay Mareykanka Taageerada Cirka

BOOSAASO, Soomaaliya - Madaxweynaha Puntland, Saciid Cabdullaahi Deni, ayaa shalay kulan heer sare ah kula yeeshay magaalada xeebta leh ee Boosaaso Taliyaha Ciidamada Hawlgallada Gaarka ah ee Mareykanka ee Afrika, Colonel Ed Norris.

Kulankan ayaa diiradda lagu saaray xoojinta iskaashiga amni, gaar ahaan howlgallada ka dhanka ah argagixisada ee ka socda Calmiskaat, kuwaas oo uu hadafkoodu yahay burburinta kooxaha xagjirka ah ee ku dhuumanaya buuraha gobolka Bari.

Sida lagu sheegay war-saxaafadeed ka soo baxay Madaxtooyadda Puntland, Madaxweynaha Deni ayaa ka mahadceliyay taageerada joogtada ah ee Dowladda Mareykanka, gaar ahaan taageerada cirka ee muhiimka ah ee lagu wiiqay awoodda Daacish.

Buuraleyda Calmiskaat ayaa muddo dheer ahayd goob ay ISIS, ku dhuuman jireen. Ciidamada Amniga Puntland (PSF), oo ka faa'ideystay taageerada cirka ee Mareykanka iyo duqeymaha tooska ah, ayaa sii xoojiyay dadaalladooda bishii la soo dhaafay si ay uga saaraan kooxda xagjirka ah aaggaas una sugaan amniga.

Intii uu socday kulanka, Madaxweynaha Deni ayaa sheegay in taageerada caalamiga ah ay muhiim u tahay sii socoshada howlgalada, gaar ahaan wadaagista xogta sirdoonka, saadka, iyo tababarka ka dhanka ah argagixisada ee loogu talagalay ciidamada Puntland ee gaarka ah.

Colonel Norris ayaa dib u xaqiijiyay ballan-qaadka Mareykanka ee ku aaddan ka caawinta saaxiibada Soomaaliyeed si loo hubiyo xasilloonida muddada dheer iyo ka hortagga khataraha argagixisada ee ka imaanaya Geeska Afrika.

Kulankan ayaa muujinaya xiriirka sii xoogeysanaya ee ka dhexeeya Puntland iyo la-taliyayaasha milateriga Mareykanka, iyadoo labada dhinacba ay wadajir u doonayaan inay xakameeyaan faafitaanka argagixisada iyo xoojinta amniga gobolka Geeska Afrika.

Dowladda Puntland ayaa sheegtay in wadahadalka Axaddii Shalay ka dhacay Boosaaso uu diiradda saarey qorsheyaasha mustaqbalka ee hawlgallada iyo baahida loo qabo in la sameeyo istaraatijiyad isku dhafan si loo xaqiijiyo in hay'adaha gargaarka iyo horumarinta ay si ammaan ah u gaaraan meelaha horey ay uga talin jireen kooxaha argagixisada.

GAROWE ONLINE