Madaxweynaha Soomaaliya oo la kulmay dhiggiisa China
-
- Posted On 05-12-2015, 12:27PM
December 5, 2015 (GO)- Madaxweynaha Soomaaliya Xasan Sheekh Maxamuud oo booqasho ku jooga dalka Koonfur Afrika ayaa xalay magalaada Johannesburg kula kulmay dhiggiisa dalka China, Xi Jinping.
Labada mas'uul ayaa iska waraystey xaaladda dalka iyo horumarka dhanka ammaanka iyo dib usoo kabashada ee la gaarey dhowrkii sano ee u dambeeyey. Waxay sidoo kale isla soo qaadeen baahida ay xilligan Soomaaliya u qabto maalgashi caalami ah.
Madaxweyne Xasan oo waraysi gaar ah siiyey Radio Muqdisho ayaa sheegay in kulankii dhex maray isaga iyo Madaxweynaha China guul kusoo dhammaaday, islamarkaana ay jiraan ballan-qaadyo badan oo dowladda China u sameysey Soomaaliya.
“Soomaaliya waxay leedahay saaxiibo badan oo kala qeyb qaadanaya dib u dhiska iyo abuurista fursado maalgashi. Waxaan shacabka Soomaaliyeed u sheegayaa in Shiinaha oo awalba uu xiriir qota dheer naga dhexeeyay aan isku afgaraney inaan iskaashigeena xoojinno" ayuu yiri.
Madaxweynaha Soomaaliya iyo wafdigiisa ayaa magaalada Johannesburg uga qayb gelaya shirka sanadlaha ah ee ay isugu yimaadaan madaxda dalalka Afrika iyo China.
China oo ah dalka labaad ee ugu dhaqaalaha badan dunida, wuxuu sanadihii u dambeeyey si weyn isha ugu hayey Qaaradda Afrika.
Xukuumadda Beijing, waxay aad u daneynaysaa inay maalgashi ku sameysto wadamada Afrika kana faa'iideysto kheyraadka dabiiciga ah ee qaaraddu hodonka ku tahay.
GAROWE ONLINE
