Madaxweynaha Soomaaliya oo La Kulmay Ra’iisul Wasaaraha Itoobiya 

ADDIS ABABA - Madaxweynaha Soomaaliya Xasan Sheekh Maxamuud ayaa Jimcihii kulan la yeeshay Ra’iisul Wasaaraha Itoobiya Abiy Axmed Ali, iyadoo kulankan uu ka dhacay sidii qayb ka mid ah Shirweynaha 38-aad ee Golaha Madaxda Dawladaha iyo Xukuumadaha Midowga Afrika (AU) ee Addis Ababa.

Labada hogaamiye ayaa ka wada hadlay sidii loo xoojin lahaa xiriirka labada dal iyo iskaashiga amniga iyo xasilloonida gobolka, iyadoo diiradda la saarayay sidii loo wajihi lahaa caqabadaha guud ee ku jira Geeska Afrika.

Madaxweynaha iyo Ra’iisul Wasaaraha ayaa mar kale adkeeyay muhiimadda ay leedahay in la sii xoojiyo wadashaqaynta diblomaasiyadeed iyo iskaashiga si loo horumariyo nabadda, amniga, iyo horumarka dhaqaalaha ee gobolka.

Kulankan ayaa yimid dhowr toddobaad ka dib markii labada dal ay xalliyeen khilaaf diblomaasiyadeed oo socday sanad ka badan, kaasoo ka dhashay Heshiiskii Muranka Dhashay ee Itoobiya iyo Somaliland, oo Soomaaliya si xooggan u diidday, iyada oo ku tilmaantay in uu xadgudub ku yahay madaxbannaanideeda.

Madaxweynaha Xasan Sheekh Maxamuud ayaa sidoo kale qorsheynaya in uu kulamo kale la yeesho madaxda kale ee Afrika si looga wada hadlo caqabadaha siyaasadeed iyo amni ee Soomaaliya, oo ay ku jiraan dadaallada lagu wajahayo al-Shabaab, isbeddelada doorashooyinka, iyo iskaashiga ballaaran ee gobolka.

GAROWE ONLINE