Madaxweyne Xasan Sheekh oo Wajahaya Go’doon Siyaasadeed iyo Isbahaysigiisii oo Burburaya  

MUQDISHO, Soomaaliya — Madaxweynaha Soomaaliya Xasan Sheekh Maxamuud ayaa wajahaya culeys siyaasadeed oo baaxad leh ka dib markii ay billaabeen inay ka fogaadaan xubnihii ugu muhiimsanaa ee gacan ka geystay dib u doorashadiisii sanadkii 2022.

Isbahaysigii markii hore u muuqday mid adag ayaa hadda u muuqda mid dildilaac weyn uu soo wajahay, taas oo dhalisay shaki ku saabsan awoodda maamulkiisa ee mudada u dhiman, illaa 15-ka bisha May 2026.

Bixitaanka siyaasiyiin miisaan culus leh, sida hoggaamiyaha Koonfur Galbeed Cabdicasiis Laftagareen oo ahaa guddoomiye ku-xigeenkii xisbiga talada haya JSP, iyo Xoghayihii guud ee xisbiga Cabdiraxmaan Odowaa, ayaa loo arkaa calaamad muujinaysa kala fogaanshaha Xasan Sheekh iyo saaxiibadeedii hore.

Inkastoo madaxweynuhu horey u sheegay in "tareenka siyaasaddiisu" uu qaadi karo qof kasta, bixitaanka qulqulka ah ee xubnahan ayaa muujinaya in kalsoonidii lagu qabay mustaqbalka tareenkaas ay sii yaraanayso, islamarakaana siyaasiyiin badan ka degeen.

Kala daadashadan waxay kusoo beegmaysaa xilli dalku wajahayo loolan adag oo la xiriira wax ka beddelka dastuurka, hannaanka doorashooyinka, iyo khilaafka u dhexeeya dowladda federaalka iyo dowlad-goboleedyada qaarkood.

Haddii uusan madaxweynuhu ku guuleysan inuu dib u mideeyo garabyada ka baxaya, waxay taasi si toos ah u wiiqi kartaa dadaallada lagu xasilinayo dalka iyo dagaalka lagula jiro kooxaha hubeysan. 

Falanqeeyayaasha siyaasadda ayaa aaminsan in Madaxweynuhu uu hadda hor yaallo imtixaan adag: inuu dib u hantiyo kalsoonida xulafadiisii sii baxaysa iyo inuu wajaho go'doon siyaasadeed oo saameyn kara hannaanka maamulkiisa inta ka dhiman muddada xilka.

GAROWE ONLINE