Mas'uul isku day dil kaga badbaadey magaalada Muqdisho

MUQDISHO, Soomaaliya - Ugu yaraan laba qof ayaa la xaqiijiyey in ku nafwaayey, ruux kalana wuu ku dhaawacmay qarax miino oo Isniinta maanta ah ka dhacay magaaladda Muqdisho.

Qaraxa oo goobjoogeyaal ay rumeysan yihiin in uu ahaa miinada meelaha fog-fog laga hago ayaa si gaar ah wuxuu uga dhacay nawaaxiga xarunta degmada Dayniile.

Sidda ay muujinayaan macluumaadka laga helayo saraakiil amni, bartilmaameedka weerarka wuxuu ahaa Mahad Sharaawe, oo ah xoghayaha degmadda Dayniile.

"Mas'uulka wuxuu marayey goobta markii uu qaraxu dhacaayey. Waxaa la sheegay in aysan waxba kasoo gaarin qaraxa oo uu badqabo," ayuu yiri sarkaal magaciis qarxiyey.

Wuxuu ku daray: "Nasiib darro, dadka geeriyoodey iyo kuwa dhaawaca ah waxay ahaayeen kuwa wada marayey. Balse, waxaa Ilaahey mahadii ah in khasaaruhu yar yahay".

Ma jirto koox illaa haatan dusha saaratay mas'uuliyadda falkaas. Balse, waxaa dhacdooyinka noocaan ah looga bartay maleyshiyada Al-Shabaab ee xiriirka la leh Al-Qaacida".

Qaraxyadda miinooyinka ayaa muddooyinkii u dambeeyay kusoo badanayey caasimadda Muqdisho, iyaddoo bartilmaameedka uu ahaa saraakiil ciidan iyo mas'uuliyiin dowladeed.

GAROWE ONLINE