Mas'uul ka tirsanaa Wasaarada Qorsheynta oo Muqdisho lagu diley
-
- Posted On 15-02-2015, 02:17PM
February 15, 2015 (GO)- Mas'uul ka tirsanaa Wasaarada Qorsheynta ee Dowlada Federaalka ayaa maanta lagu diley degmada Dharkeynley ee magaalada Muqdisho.
Mas'uulka geeriyoodey oo lagu magacaabi jirey Yuusuf Maxamed Siyaad waxaa toogtey labo nin oo bistoolado ku hubeysnaa xilli uu xafiiskiisa kusii jeedey.
Dableyda dilka geysatey ayaa durbadiiba goobta ka baxsatey haseyeeshee booliska oo daqiiqado kadib aagga dilku ka dhacay xirey ayaa qabtey dhowr qof oo laga shekiyey.
Boolisku waxay sidoo kale sheegeen inay ku raad joogaan dhowr qof oo kale, kuwaasoo la rumeysan yahay inay dilka Yuusuf Maxamed Siyaad wax ka ogaayeen.
Dilka hawl-wadeenkaas waxaa ka tacsiyeeyey wasiirka cusub ee Wasaarada Qorsheynta Cabdiraxmaan Caynte, isagoo ku hanjabey in kuwii ka dambeeyeyna sharciga la hor keeni doono.
GAROWE ONLINE
