Maxaa kusoo kordhay Weerar Al-Shabaab ee Xabsiga Sirdoonka ee Godka Jilicow?
-
GAROWE ONLINE
- Posted On 05-10-2025, 05:25AM
Muqdisho – Ciidamada ammaanka Soomaaliya ayaa soo afjaray weerar culus oo ay kooxda Al-Shabaab ku qaadeen xabsiga sirdoonka ee si weyn loo ilaaliyo, Godka Jilicow, kaas oo socday saacado badan.
Weerarka ayaa bilaabmay saacaddu marka ay ahayd 4:40 galabnimo, kadib markii gaari walxaha qarxa laga soo buuxiyay uu ku qarxay afaafka hore ee xabsiga. Kadib, 7 dagaalyahan oo ka tirsan Al-Shabaab kuna labisan dareeska ciidamada hay’adda sirdoonka (NISA), isla markaana watay gaari ay ku xardhanaayeen astaanta NISA, ayaa gudaha u galay xarunta.
War rasmi ah oo ka soo baxay dowladda ayaa lagu sheegay in dhammaan 7-dii weerarka qaaday la dilay, islamarkaana ciidamada amniga ay si buuxda u la wareegeen xabsiga kadib dagaal muddo socday.
Xabsiga Godka Jilicow ayaa loo adeegsadaa su’aallo weydiinta xubnaha Al-Shabaab ee la qabto, waxaana weerarkan uu muujinayaa in kooxda Al-Shabaab ay weli awood u leedahay inay weerarro ka fuliso caasimadda Muqdisho, inkastoo ay socdaan howlgallo ballaaran oo ay wadaan ciidamada dowladda Soomaaliya (SNA) oo kaashanaya duqeymo cirka ah oo Mareykanku ka fuliyo gobollada koonfurta iyo bartamaha Soomaaliya.
Weerarkan ayaa markale walaac ka abuuray ammaanka caasimadda, xilli dowladda Soomaaliya ay sheegtay in ay guulo ka gaartay dagaalka lagula jiro Al-Shabaab.
GAROWE ONLINE
