Maxaa looga hadlay shirka saddex-geesood ah ee ka dhacay Jabuuti?

JABUUTI — Madaxweynaha Ismaïl Omar Guelleh, Ra’iisul Wasaaraha Abiy Ahmed iyo Madaxweynaha Hassan Sheikh Mohamud ayaa Arbacadii ku yeeshay magaalada Jabuuti shir heer sare ah oo saddex-geesood ah, kaas oo diiradda lagu saaray amniga gobolka, isdhexgalka dhaqaalaha iyo caqabadaha siyaasadeed ee ka jira Geeska Afrika.

Kulankan ayaa ka dhacay hoyga gaarka ah ee Madaxweyne Geelle ee Haramuus xilli lagu guda jiray casho afur ah, waxaana ka qeyb galay wafdiyo heer sare ah oo ka socday saddexda dal.

Sida ay sheegeen mas’uuliyiin, wada-hadallada ayaa diiradda lagu saaray xaaladda guud ee Geeska Afrika, oo ay ku jiraan arrimaha nabadda iyo amniga, iskaashiga dhaqaale iyo xoojinta isdhexgalka dalalka gobolka. Hoggaamiyeyaasha ayaa sidoo kale carrabka ku adkeeyay muhiimadda wada-tashi iyo iskaashi si wax looga qabto caqabadaha wadajirka ah ee ka jira gobolka.

Intii uu socday kulanka, waxaa dib u eegis lagu sameeyay arrimaha nabadda iyo amniga, dadaallada isdhexgalka dhaqaale iyo danaha ay wadaagaan saddexda dal. Hoggaamiyeyaashu waxay sidoo kale ka hadleen colaadda ka socota Bariga Dhexe iyo saameynta dhaqaale ee ay ku yeelan karto dalalka Geeska Afrika.

Saddexda hoggaamiye ayaa ku heshiiyay in la xoojiyo iskaashiga ku dhisan danaha wadajirka ah, gaar ahaan dhinacyada isku-duwidda amniga, horumarinta dhaqaalaha iyo xoojinta isdhexgalka gobolka.

Ra’iisul Wasaare Abiy Ahmed waxaa kulanka ku wehliyay wafdi sare oo ay ka mid ahaayeen Ra’iisul Wasaare ku xigeenka Itoobiya Aden Farah, Wasiirka Maaliyadda Ahmed Shide, Wasiirka Nabadda Mohammed Edris, Madaxa Hay’adda Amniga Qaranka Aden Radwan Hussein, Wasiir-ku-xigeenka Arrimaha Dibadda Berhanu Tsegaye, Madaxa Xafiiska Ra’iisul Wasaaraha Betre Mengistu iyo Safiirka Itoobiya ee Jabuuti Legesse Tulu Adera.

Dhanka Soomaaliya, Madaxweyne Xasan Sheekh waxaa la socday Wasiirka Gaashaandhigga Ahmed Moalim Fiqi, Wasiirka Dekedaha Abdulkadir Mohamed Nur, Wasiirka Duulista Hawada Mohamed Farah Nur, Wasiirka Howlaha Guud Ayuub Ismaaciil Yuusuf iyo Wasiir-ku-xigeenka Amniga Maxamed Cali Xaga.

Madaxweyne Geelle ayaa dhankiisa waxaa kulanka ku wehliyay Wasiirka Dhaqaalaha iyo Maaliyadda Ilyas Moussa Dawaleh, Wasiirka Arrimaha Dibadda Abdoulkader Houssein Omar, Wasiirka Gaashaandhigga Hassan Omar Mohamed, Madaxa Amniga Qaranka Hassan Said Kaireh iyo Safiirka Jabuuti ee Itoobiya Abdi Mahamoud Aybeh.

Shirkan saddex-geesoodka ah ayaa qeyb ka ah wadatashiyo heer sare ah oo lagu doonayo in lagu qeexo jihada cusub ee iskaashiga istiraatiijiga ah ee dalalka Geeska Afrika.

Kulanka ayaa ku soo aadaya xilli xasaasi ah oo gobolka ka jira, iyadoo Itoobiya ay dadaal ugu jirto helitaanka marin badeed, halka Jabuuti ay isku dayeyso inay yareyso xiisadaha u dhexeeya Addis Ababa iyo Muqdisho, gaar ahaan arrimaha siyaasadeed ee la xiriira Somaliland.

GAROWE ONLINE