Maxay Villa Somalia uga reebtay Sheekh Shaakir doorashada ku celiska ah ee Galmudug?

MUQDISHO, Soomaaliya — Xisbiga Towfiiq ee uu hoggaamiyo Sheekh Maxamed Shaakir Cali Xasan ayaa laga reebay doorashada ku celiska ah ee Galmudug, taasoo dhalisay su’aalo ku saabsan ujeeddada siyaasadeed ee ka dambeysa go’aanka iyo tartanka u dhexeeya xisbiyada taageersan dowladda Federaalka ee waqtigeedu dhamaadey.

Towfiiq ayaa ka mid ahaa dhinacyadii sida weyn uga muuqday doorashadii hore ee Galmudug, waxaana xisbigu door muuqda ku lahaa tartanka siyaasadeed ee la isku hayay, iyadoo taageeradiisa ay khatar ku noqotay fursaddii musharraxa ay taageerayeen garabka dowladda mudo-dhaafka ah iyo isbahaysiga JSP.

Sheekh Maxamed Shaakir, oo hore u ahaa hoggaamiyihii Ahlu Sunna Waljamaaca ee saamaynta weyn ku lahaa Galmudug, ayaa sannadihii dambe u wareegay siyaasadda, isagoo hoggaamiya Xisbiga Towfiiq.

Ka reebista Towfiiq ee doorashada cusub ayaa timid xilli Villa Somalia ay si cad u taageerayso Liibaan Shuluq, oo ah musharrax uu garab taagan yahay Xisbiga Xasan Sheekh ee JSP.

Dadka siyaasadda Galmudug ka faallooda ayaa tallaabadan ku fasiray isku day lagu yareynayo tartanka ku wajahan musharraxa ay taageerayso Villa Somalia, gaar ahaan maadaama Towfiiq uu doorashadii hore helay taageero awood u lahayd inuu wax ka beddelo isku dheelitirka codadka.

Sida ay qabaan siyaasiyiin iyo taageerayaal ka tirsan dhinacyada mucaaradka, ka reebista Towfiiq waxay si toos ah u kordhin kartaa fursadda Liibaan Shuluq, maadaama mid ka mid ah kooxihii ugu waaweynaa ee la tartamayey uu ka maqnaan doono doorashada ku celiska ah.

Villa Somalia si rasmi ah uma aysan sheegin in ka reebista Towfiiq ay la xiriirto taageerada ay siineyso Liibaan Shuluq, halka dhinacyada taageersan dowladda ay ku doodayaan in ururrada ka qaybgalaya doorashada lagu saleeyay shuruudaha iyo habraacyada guddiga doorashada.

Si kastaba, go'aanka ayaa kusoo beegmaya xilli Galmudug ay ku jirto loollan siyaasadeed oo xooggan, iyadoo doorashada ku celiska ah ay noqotay goob ay isku hayaan dowladda Federaalka ee mudo-korarsiga xafiiska ku joogto, siyaasiyiinta deegaanka iyo ururrada siyaasadeed ee doonaya inay saameyn ku yeeshaan maamulka.

Sheekh Shaakir ayaa hore uga soo muuqday Galmudug isagoo ahaa hoggaamiye awood ciidan iyo mid siyaasadeedba leh. Ahlu Sunna, oo uu hoggaaminayay, ayaa mar gacanta ku haysay magaalooyin muhiim ah oo ku yaalla bartamaha dalka, ka hor inta aysan kooxda iyo dowladda Federaalka isku dhicin.

Hadda, Sheekh Shaakir wuxuu isku dayayaa inuu saameyntaas ku sii ilaashado waddada siyaasadda, balse ka maqnaanshaha Xisbiga Towfiiq ee doorashada ku celiska ah ayaa dhabar-jab ku noqon kara qorshihiisa siyaasadeed ee Galmudug.

Doorashada cusub ayaa sidaas darteed noqonaysa tartan si weyn loogu kala aragti duwan yahay, iyadoo guusha Liibaan Shuluq ay xoojin karto saamaynta Villa Somalia ee Galmudug, halka ka qaybgalka ama maqnaanshaha kooxaha kale uu si weyn u beddeli karo natiijada tartanka.

GAROWE ONLINE