Mucaaradka oo Dacwad Ka Gudbinaya Madaxweyne Xasan Sheekh

Muqdisho – Xiisad siyaasadeed oo cirka isku shareertay ayaa ka dhalatay kadib markii Mucaaradka, oo ay hoggaan u yihiin siyaasiyiin waaweyn oo ay kamid yihiin Madaxweynihii hore ee Soomaaliya Shariif Sheekh Axmed, ay ku dhawaaqeen dacwad ay ka gudbinayaan Madaxweyne Xasan Sheekh iyo saraakiil sare oo ka tirsan dowladda.

Dacwaddan ayaa lagu eedeeyay Madaxweynaha iyo xubno katirsan xukuumadda in ay ku kaceen musuqmaasuq, xadgudubyo ka dhan ah xuquuqda aadanaha, iyo jabinta dastuurka Federaalka ee 2012.

Madasha mucaaradka ayaa xustay in xukuumadda hadda jirta ay si sharci-darro ah u beddeshay qodobo muhiim ah oo ka tirsan dastuurka, ay dib u dhigtay doorashooyinkii dowlad-goboleedyada, isla markaana ay ku lug yeelatay iibinta dhul dadweyne, taas oo keentay barakaca qoysas sabool ah.

Mucaaradka ayaa sidoo kale sheegay in dalka uu wajahay muran siyaasadeed iyo mid dastuur ah oo khatar weyn ku ah dowlad-dhisidda iyo amniga qaran. Waxay ku eedeeyeen xukuumadda Xasan Sheekh in ay xoogga saarayso hanashada awoodda siyaasadeed, halka ay iska indho-tireyso dagaalka lagula jiro kooxda Al-Shabaab.

Madasha waxay ugu baaqday shacabka Soomaaliyeed ee gudaha iyo dibedda jooga in ay si nabad ah u mudaharaadaan, si ay u muujiyaan diidmada ay u qabaan waxa ay ugu yeereen xukun musuq iyo kali-talisnimo ku dhisan.

Xiisaddan ayaa timid maalin kadib markii iska horimaad hubeysan uu ka dhacay Saldhigga Booliska Degmada Warta Nabadda ee magaalada Muqdisho, taas oo dowladda ay ku eedeysay siyaasiyiin mucaarad ah in ay isku dayeen in ay xoog ku galaan xaruntaasi.

Dowladdu wali si rasmi ah ugama jawaabin dacwadda cusub ee mucaaradku ku dhawaaqeen, balse khubarada siyaasadeed waxay sheegayaan in arrintani ay sii hurin karto xiisadda siyaasadeed ee ka aloosan Muqdisho.

GAROWE ONLINE