Mucaaradka oo ku dhawaaqay fashilka shirkii Madaxweyne Xasan Sheekh

MUQDISHO — Golaha Samatabixinta Soomaaliyeed ayaa maanta ku dhawaaqay in shirkii ugu dambeeyay ee ay la yeesheen Madaxweynaha Soomaaliya, Xasan Sheekh Maxamuud, uu ku dhammaaday guuldarro.

Golaha ayaa fashilkaas ku tilmaamay mid nasiib darro ah, balse waxay cadeeyeen inay weli diyaar u yihiin inay sii wadaan wadahadallada lagu xalinayo khilaafaadka siyaasadeed ee dalka, gaar ahaan arrimaha doorashada iyo dib-u-habaynta dastuurka.

Qoraal rasmi ah oo ka soo baxay Madasha Samatabixinta ayaa lagu sheegay in aysan weli jirin heshiis la gaaray oo shacabka rajo gelinaya isla markaana ka hortagi kara qalalaasaha siyaasadeed ee sii kordhaya.

Golaha ayaa sidoo kale ku baaqay in si dhaqso ah loo soo afjaro khilaafaadka jira, loona midoobo dadaallada lagula dagaalamayo kooxaha argagixisada ee dalka ka howlgala, si loo sugo amniga iyo xasiloonida Soomaaliya.

Intaa waxaa dheer, Madashu waxay xooga saartay muhiimadda ay leedahay in dib loo bilaabo wada-hadallada qaran ee ay ka qeyb qaadanayaan dhammaan dhinacyada muhiimka ah ee dalka, si loo helo heshiis ballaaran oo saldhig u noqon kara dhismaha mustaqbalka nabdoon iyo horumar waara. Golaha ayaa tilmaamay in wadahadallada noocan ah ay yihiin jidka kaliya ee lagu gaari karo nabad iyo xasilooni dhab ah.

GAROWE ONLINE