Mucaaradka Soomaaliya oo ka digay boonka dhulalka danta guud

Ganacsatada ayay si gaar ah ugu waaniyeen in ay ka fogaadaan ku lug-lahaanshiyaha bililiqadan.

MUQDISHO, Soomaaliya - Madaxweynihii hore ee Soomaaliya Shariif Sheekh Axmed, Ra’iisul Wasaarihii hore ee Soomaaliya Xasan Cali Kheyre iyo Xildhibaan C/raxmaan C/shakuur Warsame ayaa digniin culus u jeediyay ganacsatada iyo shaqsiyaadka ku saabsan in ay heystaan ​​dhulalka danta guud ee magaalada Muqdisho.

War-murtiyeed ay si wadajir ah u soo saareen saddexdan siyaasi ee caanka ah Sabtidii shalay, waxay ku eedeeyeen dawladda federaalka inay barakicisay dadka deegaanka, isla markaana ku xad-gudbaynayso goobaha waxbarashada iyo caafimaadka. Waxay ku andacoonayaan in dhulkii danta guud lagu xaraashayo dad ganacsato ah, oo reero gaar ah loo qaybiyo, ama siyaasiyiintu laaluush ku qaataan.

“Waxaan uga digaynaa ganacsatada sida sharci darrada ah u iibisa ama ku hesha dhul danta guud ah iyo kuwa ku howlan laaluushka in aan lagu kadsoomin in ay aaminsan yihiin in ay leeyihiin ama ay maamulaan dhul dowladeed” ayaa lagu yiri qoraalka.

Hogaamiyayaasha ayaa sidoo kale walaac ka muujiyay dowladnimada Soomaaliya ee hadda jirta, iyagoo tusaale u soo qaatay caqabadaha amni, dhaqaale iyo siyaasadeed. Waxa ay ku booriyeen dowladda federaalka in ay qaado tallaabooyin degdeg ah oo wax looga qabanayo arrimahan adag.

Dowladda Soomaaliya ayaa dhawaan dib u soo ceshatay dhulal dan guud ah oo dib u habeyn loogu sameyn lahaa xarumaha dowladda. Si kastaba ha ahaatee, wararka ayaa sheegaya in guryaha qaar lagu wareejiyay ama laga kireeyay ganacsiyo gaar ah. Waxaa xusid mudan, in dawladdu ay dhawaan burburisay xabaalaha Policia School si loogu sameeyo saldhig ciidan.

GAROWE ONLINE