Muqdisho oo looga dhawaaqay shir Soomaaliya looga badbaadinayo firaaq dastuuri ah

MUQDISHO, Soomaaliya — Golaha Mustaqbalka Soomaaliyeed ayaa shalay shaaciyay inay toban bisha Abriil fidin doonaan gogol weyn oo loogu magac daray "badbaadinta dowladnimada Soomaaliya," kadib markii ay Madaxweyne Xasan Sheekh Maxamuud ku eedeeyeen inuu hortaagan yahay heshiis laga gaaro doorashooyinka dalka.

War-murtiyeed ka soo baxay shir ay magaalada Muqdisho ku yeesheen xildhibaannada labada aqal ee Baarlamaanka Federaalka, siyaasiyiin iyo waxgarad, ayay ku sheegeen in dalku wajahayo hubanti la’aan siyaasadeed. Goluhu wuxuu carrabka ku adkeeyay in muddo-xileedka labada aqal ee Baarlamaanka uu ku egyahay 14-ka Abriil, taas oo keeni karta firaaq dastuuri ah haddii aan xal degdeg ah la helin.

Qodobada ugu waaweyn ee war-murtiyeedka waxaa kamid ahaa:

Xadgudub Dastuuri ah: Golaha ayaa ku eedeeyay Madaxweynaha iyo Guddoonka labada aqal inay ku xadgudbeen Qodobka 134-aad ee Dastuurka, kaas oo qeexaya nidaamka rasmiga ah ee wax-ka-beddelka dastuurka.

Caburinta Xildhibaannada: Waxay sheegeen in in ka badan 50 xildhibaan si sharci-darro ah looga hor-istaagay ka qaybgalka fadhiyada Baarlamaanka, sababo la xiriira mowqifkooda ku aaddan isbeddelka dastuurka.

Doorashooyinka Maamul Goboleedyada: Goluhu wuxuu walaac ka muujiyay muddo-dhaafka ka jira qaar kamid ah dowlad-goboleedyada, iyagoo ku baaqay in si degdeg ah loo qabto doorashooyinka maamulladaas si loo ilaaliyo nidaamka federaalka iyo kala-soocidda awoodaha.

Ugu dambeyntii, Golaha Mustaqbalka ayaa ku baaqay in loo midoobo badbaadinta qaranka, si looga fogaado qalalaase siyaasadeed oo ka dhasha muddo-xileedka dhammaanaya iyo muranka ka taagan hannaanka doorashooyinka.

GAROWE ONLINE