Museveni: Soomaaliya waxay u baahan tahay taageeradii la siiyay Uganda xiligii Idi Amin

KAMPALA - Madaxweynaha Uganda, Yoweri Kaguta Museveni, ayaa ku baaqay in la xoojiyo midnimada Afrikaanka iyo in la kordhiyo taageerada dhaqaale ee Soomaaliya si loo gaaro nabad waarta iyo xasillooni gobolka Geeska Afrika.

Wuxuu hadalkan ka jeediyay Shirweynihii Gaarka ahaa ee Waddamada Ciidamada Soo-gudbiyay ee Hawlgalka Midowga Afrika ee Taageerada iyo Xasilinta Soomaaliya (AUSSOM), oo lagu qabtay State House, Entebbe. 

Shirkan ayaa diiradda lagu saaray xaaladda amni ee Soomaaliya, mustaqbalka hawlgalka AUSSOM, iyo dadaallada guud ee gobolka ee ka dhanka ah argagixisada iyo dib-u-dhiska xasilloonida. Madaxweyne Museveni ayaa sheegay in taageerada dheeraadka ah ee dhaqaale ay muhiim u tahay guusha hawlgalkan, isagoo ku booriyay dalalka Afrika iyo saaxiibada caalamiga ah inay kordhiyaan taageeradooda Soomaaliya.

Madaxweyne Museveni ayaa sidoo kale xusuusiyay in midnimada iyo is-kaashiga Afrikaanka ay muhiim u yihiin horumarka iyo xasilloonida gobolka, isagoo tusaale u soo qaatay taageeradii ay dalalka Afrikaanka ah siiyeen Uganda intii lagu jiray dagaalkii ka dhanka ahaa xukunkii kali-taliska ee Idi Amin. Wuxuu sheegay in "midnimada ayaa Afrika gaarsiisay meesha ay maanta joogto."

Shirweynahan ayaa sidoo kale ka qaybgalay madaxda kale ee Afrika, oo ay ku jiraan Ra'iisul Wasaaraha Jabuuti, Abdoulkader Kamil Mohamed; Madaxweyne Ku-xigeenka Kenya, Prof. Kithure Kindiki; Ra'iisul Wasaaraha Masar, Dr. Mostafa Madbouly; Wasiirka Gaashaandhigga Itoobiya, Aisha Mohammed Mussa; iyo Xoghayaha Guud ee IGAD, Dr. Workneh Gebeyehu.

Madaxweyne Museveni ayaa ugu dambeyntii ku booriyay bulshada caalamka inay si joogto ah u taageeraan dadaallada Soomaaliya ee dhismaha hay'adaha, la-dagaallanka isbedelka cimilada, iyo ka jawaabista xaaladaha bani'aadamnimo ee dalka.

GAROWE ONLINE