Nabadoon xalay lagu diley degmada Marka
-
- Posted On 24-06-2015, 09:06AM
June 22, 2015 (GO)- Nabadoon Cali Xamza oo kamid ahaa nabadoonnada ugu caansan gobolka Shabeellada Hoose ayaa xalay degmada Marko lagu diley.
Nabadoonka waxaa la toogtey xilli uu salaadii Taraawiixda kasoo baxay islamarkaana marayey meel u dhow gurigiisa oo ku yaalla bartamaha magaalada.
Dad goob-joogeyaal ah ayaa Garowe Online u sheegay in dilka ay fuliyeen labo nin oo wejiga soo duubtey islamarkaana bistoolado ku hubeysnaa. Dableyda dilka fulisey oo aan ilaa iyo hadda haybtooda la aqoonsan ayaa durbadiiba goobta ka baxsaday.
Ciidamada ammaanka ayaa daqiiqado kaddib goobta soo gaarey, waxayna sameeyeen baaritaan muddo kooban socdey, balse ilaa iyo hadda falkaas cid looma soo qaban.
Nabadoon Cali Xamza ayaa noqonaya nabadoonkii saddexaad ee bishan Ramadaan gudaheeda la dilo, waxaana ka horreeyey labo nabadoon oo isla todobaadkan lagu diley magaalada Beledweyn ee xarunta gobolka Hiiraan.
GAROWE ONLINE
