Puntland oo diiday hirgelinta nidaamka e-visa ee Dowladda Federaalka Soomaaliya

GAROOWE – Dowladda Puntland ayaa si cad u diiday inay hirgeliso nidaamka fiisaha elektaroonigga ah (e-visa) ee ay dhawaan soo rogtay Dowladda Federaalka Soomaaliya, taasoo keentay khilaaf cusub oo u dhexeeya labada dhinac.

Wasaaradda Maaliyadda Puntland ayaa sheegtay in nidaamka e-visa-ga aanu khuseynin maamulka Puntland, isla markaana qof kasta oo dalka ku soo gala dekedaha iyo garoomada maamulkaas uu weli bixin doono fiiso gooni ah oo ay soo saarto Puntland.

Tallaabadan ayaa timid kadib markii Dowladda Federaalka ay bilowday nidaam cusub oo dadka soo galaya Soomaaliya looga baahan yahay inay online kaga codsadaan fiisaha elektaroonigga ah, si loo mideeyo nidaamka socdaalka dalka iyo dakhli ururinta.

Dad badan oo fiiso Federaal ah ku yimid garoonka diyaaradaha ee Boosaaso ayaa lagu amray inay mar kale bixiyaan fiiso kale oo Puntland ah.

Khubarada siyaasadda ayaa sheegay in arrintan ay sii muujinayso khilaafka u dhexeeya Dowladda Federaalka iyo Puntland, islamarkaana ay caqabad ku noqon karto dadaallada lagu doonayo in lagu mideeyo nidaamyada maaliyadeed iyo socdaalka dalka oo dhan.

Ilaa hadda, Dowladda Federaalka Soomaaliya kama aysan hadlin go’aanka Puntland, hase yeeshee ilo ku dhow Villa Soomaaliya ayaa sheegay in ay socdaan dadaallo lagu doonayo in lagu xalliyo arrintan si aanay u saameyn nidaamka socdaalka guud ee dalka.

GAROWE ONLINE