Qarax dad ku dhaawacmeen oo ka dhacay Jowhar
-
- Posted On 11-03-2015, 07:06AM
March 11, 2015 (GO)- Gaari ay wateen ciidamo ka tirsan kuwa Dowladda Federaala ayaa xalay qarax lagula eegtay degmada Jowhar ee gobolka Shabeellada Dhexe.
Bam nooca gacanta ah ayaa lagu tuurey gaariga xilli uu marayey xaafadda Hantiwadaag. Weerarka waxaa ku dhaawacmey afar qof oo dhammaantood askar ahaa.
Askarta dhaawacantey oo labo kamid ah xaaladoodu halis tahay waxaa xilligan lagu dabiibayaa isbitaalka guud ee degmada.
Ciidamada ammaanka ayaa daqiiqado kadib soo gaarey aagga uu qaraxu ka dhacay, waxayna gacanta kusoo dhigeen dhowr qof oo falkaas lala xiriirinayo.
Ciidamadu waxay sidoo kale xireen qaar kamid ah jidadka muhiimka ah ee dhex mara xaafadda Hantiwadaag, inkastoo saaka dib loo furey.
Xaaladda Jowhar ayaa maanta ah mid deggen, waxaana si caadi ah ku socda dhaq dhaqaaqa dadka iyo gaadiida.
GAROWE ONLINE
