Qarax ka dhacay duleedka magaaladda Muqdisho

Muqdisho – Ugu yaraan laba oday dhaqameed ayaa ku dhintay, laba ilaalo oo la socdayna way ku dhaawacmeen kadib qarax miino oo lala beegsaday gaarigooda maanta oo Khamiis ah, deegaanka Jabad Geelle ee ku dhow Muqdisho, sida ay sheegeen mas’uuliyiin.

Qaraxa ayaa ka dhacay tuulada Jabad Geelle oo ku taalla deegaanka Elasha Biyaha, qiyaastii 15 kiiloomitir dhanka koonfureed kaga beegan caasimadda. Odayaasha la dilay ayaa lagu magacaabay Cali Kadawe iyo Maxamed Cumar, halka labada ilaaladooda ah oo dhaawacmay loo qaaday isbitaal ku yaalla Muqdisho, sida ay xaqiijiyeen masuuliyiinta amniga.

Wararka deegaanka ayaa sheegaya in odayaasha ay wadeen baaritaan ku saabsan dhul markii ay miinadu qaraxday. Murannada dhulka ayaa si joogto ah uga dhaca agagaarka Muqdisho, kuwaas oo mararka qaar horseeda gacan ka hadal ama weerarro qorsheysan.

Ciidamada Booliska Soomaaliyeed iyo kuwa Nabad Sugidda (NISA) ayaa gaaray goobta qaraxa, iyagoo sameeyay howlgal raad-raac ah, balse lama soo sheegin cid loo qabtay weerarka, sidoo kalena cid sheegatay mas’uuliyadda lama hayo.

Qaraxyada miino ee waddooyinka ayaa hoos u dhacay marka loo eego sannadihii hore, balse weerarkan maanta dhacay ayaa si weyn u naxdiyay dadka deegaanka, kuwaas oo sheegay inay cabsi hor leh ka qaadeen weerarrada noocan oo kale ah.

“Qaraxan wuxuu dib u xasuusiyay dadka deegaanka cabsiihii qaraxyada joogtada ahaa ee dhowr sano ka hor dhacayay,” ayuu yiri mid ka mid ah dadka deegaanka oo codsaday in magaciisa aan la xusin.

Ilaa iyo hadda, ma jiro war rasmi ah oo kasoo baxay dowladda federaalka, balse falkaan ayaa kusoo beegmaya xilli ay dowladda ku jirto dadaallo amni oo ballaaran si loo sugo xasilloonida caasimadda iyo nawaaxigeeda.

GAROWE ONLINE