Safaaradda Soomaaliya ee dalka Uganda oo shaqo joojin sameysay

KAMPALA, Uganda – Mas'uuliyiinta safaaradda Soomaaliya ee Uganda ayaa waxay ku dhawaaqay in ay sameynayaan shaqo joojin muddo 14-maalmood ah kadib amar kasoo baxay xukuumada Kampala.

War-saxaafadeed kasoo baxay safaarada oo nuqul kamid ah uu arkay Garowe Online ayaa lagu sheegay talaabada ay qaadeen la xiriirto ka hortagga Coronavirus.

Dowladda Uganda ayaa mamnuucday isu-imaatinka dadweynaha iyo gaadiidka dadweynaha markii 14-kiis laga helay waddankaas.

"Safaaradda Jamhuuriyadda Federaalka Soomaaliya, iyaddoo ka duuleysa ka hortagida cudurka dhibaatada ba'an ku haya aduunka oo dhan ee Covid-19 soona gaaray dalka Uganda, oo illaa iyo hadda laga helay 14 qof".

Warka qoraalka ah ayaa intaas ku daray: "Safaaradda Jamhuuriyadda federaalka Soomaaliya iyaddoo ilaalineysa badqabka muwaadinka Soomaaliyeed ee sidda joogtada ah ugu xiran safaarad".

"Iyaddoo la tixgelinayo awaamiirta dowlada Uganda ee martida aanu u nahay in la joojiyey muddo 14 cisho ah dhamaan gaadiidka dadweynaha oo muwaadiniinta Soomaaliyeed safaarada ku imaan jireen sidda taksiyada, Basaska iyo Bajaajta," ayaa la raaciyey qoraalka.

Bayaanka ayaa lagu soo xiray: "…haddaba safaaradda Soomaaliya ee Uganda waxay hakisay shaqooyinka muddo 14-cisho ah".

Todobaadkii hore ayay ahayd markii safaaradaha Soomaaliya ee dalalka Kenya iyoo Hindiya ay ku shaaca ka qaadeen in ay joojiyeen howlahooda markii wadamadaas laga soo wariyey kiisas caabuqaas ah.

GAROWE ONLINE