Shaqaale ka tirsanaa hay'ad samafal oo maanta Gedo lagu afduubey
-
- Posted On 12-04-2015, 02:25PM
April 12, 2015 (GO)- Todoba qof oo u shaqeynayey hay'adda Solidarity International iyo xawaaladda Hodan Global ayaa maanta laga afduubtey duleedka degmada Ceelwaaq ee gobolka Gedo.
Dadkan oo dhammaantood Soomaali ah, waxaa in la afduubtey warbaahinta u xaqiijiyey duqa degmada Ceelwaaq Ibraahim Guuleed Aadan.
Ibraahim ayaa sidoo kale sheegay in todobada qof oo isugu jira afar u shaqeynayey hay'adda Solidarity, labo ka tirsan Hodon Global iyo dareewalkii gaariga laga qafaashey meel 30km u jirta deegaanka Fafax-dhuun.
Mar la weydiiyey cidda afduubkan ka dambeysa wuxuu sheegay in ilaa iyo hadda si rasmi ah loo xaqiijin balse tilmaamaha hordhaca ah ee la helay ay muujinayaan in Al-shabaab dadkaas afduubatey.
Ma ahan markii ugu horreysey ee gobolka Gedo lagu afduubto shaqaale hay'ad samafal, waxayna arrintani kusoo aadeysaa labo todobaad kadib weerarkii Al-shabaab ka fulisey magaalada Gaarisa ee gobolka waqooyi bari kenya.
GAROWE ONLINE
