Sheekh Shariif oo u guuray waqooyiga Muqdisho si uga baaqsado xabsi guri suurtagal ah ka hor bannaanbaxa

MUQDISHO – Madaxweynihii hore ee Soomaaliya Sheekh Shariif Sheekh Axmed ayaa u guuray waqooyiga magaalada Muqdisho, iyadoo ilo siyaasadeed ay sheegayaan in tallaabadan ay la xiriirto cabsi laga qabo in lagu soo rogo xabsi guri ka hor bannaanbaxa mucaaradka ee lagu wado inuu Jimcaha ka dhaco caasimadda.

Ilo xog ogaal ah ayaa sheegay in Sheekh Shariif uu doonayo inuu dhex dego reerkiisa si looga hortago tallaabooyin amni oo suurtagal ah, xilli ay cirka isku sii shareerayaan xiisadaha siyaasadeed ee Muqdisho.

Wararka ayaa sheegaya in Sheekh Shariif uu kamid yahay siyaasiyiinta mucaaradka ee diyaar u ah inay ka qeyb galaan bannaanbaxa, inkastoo ay jiraan walaacyo laga qabo in rabshado ama isku dhacyo ay dhacaan.

Xaaladda ammaanka Muqdisho ayaa kacsan iyadoo mucaaradka iyo dowladda Federaalka ay isku hayaan eedeymo la xiriira barakacinta shacabka iyo qorshaha mudaharaadka la filayo inuu ka dhaco magaalada.

Dowladda Federaalka Soomaaliya ayaan weli si rasmi ah uga hadlin wararka la xiriira tallaabooyinka amni ee laga cabsi qabo in lagu beegsado siyaasiyiinta mucaaradka.

GAROWE ONLINE