Sii hayaha Wasiirka Arrimaha Dibadda oo la kulmey mas’uul sare oo ka tirsan Midowga Africa

Kulankan ayaa daarnaa muhiimada uu ganacsiga xorta ah u leeyahay ganacsatada dhamaan dalalka Africa,

Addis Ababa (GO) - Wasiiru Dawlaha ahna sii hayaha Wasiirka Wasaaradda Arrimaha Dibadda iyo iskaashiga caalamiga ah ee XFS Mudane Cali Cumar “Balcad” ayaa la kulmey Xoghayaha Guud ee aaga Ganacsiga Xorta ah ee Midowga Africa ee loo yaqaano AFCTFA.

Wasiirka oo ka qeyb galaya meertada 37-aad ee Midowga Africa ayaa kulan gaar ah la yeeshay xoghayaha Guud ee aaga ganacsiga xorta ah ee Midowga Africa Wamkele Mene.

Kulankan ayaa looga wada hadlay muhiimada uu ganacsiga xorta ah u leeyahay ganacsatada kala duwan ee dalka iyo dhamaan dalalka Africa, isla markaana loo baahan yahay in la dar-dar geliyo in Soomaaliya ay meel mariso ka mid noqoshada suuqa ganacsiga xorta ah ee Africa.

Wasiir Cali Balcad intii uu ku guda jiray Kulanka yiri: “Soomaaliya waxay u diyaarsan tahay xiligan sidii ay ula jaanqaadi lahayd dunida casriga ah gaar ahaan is dhex galka ganacsiga africa.”

Wasiirka ayaa intaasi ku daray in dowladda Soomaaliya ay dedaal xoog leh ku bixinayso kor u qaadista xiriirka ganacsi ee Soomaaliya kala dhexaaya dalalka Africa iyo caalamka intiisa kale.

GAROWE ONLINE