Somalia oo ku adkaysanaysa in khilaafka dhamayso Hague
-
- Posted On 10-10-2015, 08:52PM
10 Octobar, 2015(GO)-War saxaafadeed ka soo baxay xafiiska xeer ilaaliha guud ee Qaranka Somalia Axmed Cali Daahir, ayaa looga hadlay dacwadda Badda ee u dhaxaysa Somalia iyo Kenya.
Xeer ilaaliyaha ayaa qoraalkiisa ku sheegay in Kenya ka werwersantahay in muranka biyaha lagu dhammeeyo qaab cadaalad ah, taasina cadaynayso inaysan sal iyo raad toonna lahayn arrimaha ay ku andacoonayaan.
Axmed ayaa rajo ka muujiyay dowladda Kenya inay u hoggaansanto shuruucda caalamiga ah, maadaama ka mid tahay dowladihii saxiixay, laguna yiqiin tixgelinta iyo dhaqan gelinta qawaaniinta caalamiga ah.
Xeer ilaaliyaha guud waxaa uu tilmaamay inay ku kalsoon yihiin in maxkamaddu gaari doonto go'aan ku saleysan caddaalad.
War saxaafadeedkan ayaa daba socda qoraal Dowladda Kenya si rasmi ah ugu diidey dacwadda la xiriirta badda Somalia oo loog gudbiyey maxkamadda caalamiga ah ee cadaaladda (ICJ).
Xeer ilaaliyaha Guud ee Kenya Githu Muigai ayaa ku sheegey dacwadda Somalia in ay tahay mid aan sharci aheyn.
GAROWEONLINE
