Somaliland oo uga digtay Xamsa Cabdi Barre inuu booqdo Laascaanood

HARGEYSA, Soomaaliya - Somaliland ayaa digniin adag u dirtay Ra'iisul Wasaare Xamse Cabdi Barre oo qorsheynaya inuu booqdo magaalada Laascaanood, caasimadda maamulka SSC-Khatumo, oo Somaliland sheegato inay ka mid tahay xuduudaheeda.

Wasiirka Warfaafinta Somaliland, Axmed Yaasiin, ayaa ku eedeeyay dowladda federaalka Soomaaliya inay si ujeeddo leh u kicinayso khilaafaadka ka taagan gobolka, isagoo sheegay in booqashada Ra'iisul Wasaaraha ay tahay dhoolatus siyaasadeed oo lagu dardar gelinayo mushkiladaha taagan.

Wasiirka ayaa sidoo kale ka dhawaajiyay in qorshaha dowladda federaalka ee doorashada qof iyo codka ee gobollada Sool, Sanaag, iyo Buuhoodle uu yahay mid "aan macquul ahayn," isagoo sheegay in dowladda Soomaaliya ay mas'uuliyadda wixii ka yimaada safarka Xamse ay qaadi doonto.

Dhanka kale, Ra'iisul Wasaare Barre ayaa ku adkeysanaya in booqashadiisu ay qayb ka tahay dadaal uu ku doonayo inuu xoojiyo midnimada qaranka iyo taageerada maamulka SSC-Khatumo ee dhawaan la asaasay.

Ra'iisul Wasaaraha ayaa sidoo kale sheegay in booqashadiisu aysan noqon doonin mid lagu dhibaateynayo gobol ama maamul gaar ah, balse ay tahay mid lagu xoojinayo midnimada dalka Soomaaliya.

Somaliland ayaa lagala wareegay Laascaanood 2023 markii uu dhacay kacdoon dadweyne oo ka dhan ah maamulka Hargeysa, taasoo keentay in maamulka SSC-Khatumo uu dhismo. Tan iyo markaas, maamulka SSC-Khatumo ayaa xiriir la yeeshay dowladda federaalka Soomaaliya ee Muqdisho.

GAROWE ONLINE