Soomaaliya: Ciidamo lagu daadiyay Muqdisho kahor doorashada lagu muransan yahay

MUQDISHO — Dowladda Federaalka Soomaaliya ayaa kordhisay ciidamo amni oo lagu arkay waddooyinka waaweyn iyo goobaha muhiimka ah ee caasimadda Muqdisho, iyadoo la filayo in Khamiista ay ka dhacdo doorashada golayaasha deegaanka ee Gobolka Banaadir.

Ciidamo ka kala socda Booliiska iyo hay’adaha kale ee ammaanka ayaa la geeyay waddooyinka isku xira xarumaha muhiimka ah iyo goobaha codbixinta, si loo sugo badbaadada muwaadiniinta iyo habsami u socodka hanaanka doorashada.

Mas’uuliyiin amni ayaa sheegay in tallaabooyinkan ay qeyb ka yihiin qorshe ballaaran oo looga hortagayo falal carqaladeyn kara doorashada, xilli degmooyinka Gobolka Banaadir laga dareemayo diyaargarowgii ugu dambeeyay ee codeynta.

Tallaabadan ayaa daba socota shir amni oo xalay ka dhacay Muqdisho, kaas oo ay ka qeyb galeen saraakiil sare oo ka tirsan Ciidanka Booliiska iyo Guddiga Doorashooyinka, iyadoo diiradda lagu saaray isku-duwidda amniga goobaha doorashada.

Doorashada golayaasha deegaanka ee Gobolka Banaadir ayaa la filayaa inay dhacdo 25-ka bishan, iyadoo codbixintu ku saleysan tahay nidaam xisbiyo iyo ururo siyaasadeed lagu kala dooranayo, halkii ay ka ahaan lahayd doorasho qof-qof ah.

Si loo adkeeyo amniga, dowladda Soomaaliya ayaa shaacisay in maalinta doorashada la xaddidi doono isu-socodka gaadiidka ee qaar ka mid ah waddooyinka caasimadda, isla markaana si ku-meel-gaar ah loo joojin doono duulimaadyada garoonka diyaaradaha Aadan Cadde.

GAROWE ONLINE