Soomaaliya: DFS oo Ciidan geysay Xadka Kenya iyo Dagaal laga digay inuu dhaco

KISMAAYO - Xildhibaannada federaalka ee ka soo jeeda dowlad-goboleedka Jubaland ayaa ku eedeeyay dowladda federaalka Soomaaliya inay ciidamo geysay xadka Kenya, taas oo laga yaabo inay keento dagaal, bilo kadib markii ciidanka xoogga dalka ay guul darrooyin waaweyn kala kulmeen dagaalkii Raaskambooni looga saarey.

Sida ay sheegeen xildhibaannada, dowladda federaalka ayaa go’aansatay inay carqaladayso dowlad-goboleedka Jubaland si ay xilka uga tuurto hoggaanka hadda jira ee madaxweynaha Axmed Islaam Maxamed Madoobe, oo khilaaf soo dhex galay isaga iyo dowladda dhexe.

Iyagoo aan caddeyn buuxda bixin, saraakiisha Jubaland ayaa ku andacooday in saraakiil hore oo ka tirsanaa ciidanka oo horey uga howlgalay Jubaland dib loogu yeeray si ay ugu adeegaan xadka Kenya-Soomaaliya, iyagoo ku dooday in dhaqdhaqaaqyadaas ay keeni karaan xiisado cusub.

“Dowladda federaalka si kas ah ayay u diyaarineysaa una maalgelinaysaa maleeshiyaad si ay uga abuuraan amni darro xadka ayna u carqaladeeyaan nabadda Jubaland iyo Kenya oo deris ah,” ayaa lagu yiri bayaan ka soo baxay Xildhibaanada.

Dowladda federaalka Soomaaliya weli kama aysan jawaabin eedeymahaas. Si kastaba ha ahaatee, Cabdulkadir Maxamed Nuur, wasiirka difaaca Soomaaliya, ayaa sheegay in dowladda federaalka ay xiriir la sameyneyso maamulka Jubaland si dib loogu heshiisiiyo.

Bishii Nofeembar, Madoobe ayaa qabtay doorasho dadban oo uu ku soo laabtay xilka madaxweynenimada, taas oo ka dhalisay mucaaradad ka timid Muqdisho oo doonaysa in doorashooyin toos ah la qabto. Sida uu sheegay Madoobe, doorashooyinka codbixinta guud waxay horseedi karaan muddo kordhin sharci-darro ah.

Madaxweynaha Xasan Sheekh Maxamuud ayaa ku dadaalaya inuu mideeyo dalka, iyadoo dowlad-goboleedyada qaar, sida Puntland iyo Jubaland, ay ku eedeeyeen inuu faragelin ku sameynayo dastuurka iyada oo aan lagala tashan si ku filan. Labada dowlad-goboleed sidoo kale waxay ku eedeeyeen inuu fara gelin ku hayo nidaamka federaalka oo ah saldhigga xasilloonida hadda jirta.

Ciidamada Jubaland ayaa ku guuleystay inay ka adkaadaan ciidamada Gorgor ee sida gaarka ah u tababaran bishii Nofeembar, taasoo keentay in qaar ka mid ah ciidamadaas ay magan-galyo ka raadsadaan saldhigyada hore ee Ciidanka Difaaca Kenya ee ku yaalla xadka. Kenya ayaa bilowday dadaallo dhexdhexaadin ah oo u dhexeeya Kismaayo iyo Muqdisho, balse wax natiijo ah oo muuqata lama shaacin.

GAROWE ONLINE