Soomaaliya: Mareykanka oo ku duqeeyay Daacishta Buuraha Calmiskaad

BOSAASO, Soomaaliya — Taliska AFRICOM ayaa sheegay inuu fuliyay duqeyn cirka ah oo lagu beegsaday dagaalyahanno ka tirsan Daacish, taas oo ka dhacday Calmiskaad, iyadoo ay weli socdaan howlgallo ka dhan ah kooxaha ku dhuumaaleysanaya buuraha gobolka Bari.

Bayaan ay AFRICOM soo saartay ayaa lagu sheegay in duqeyntu ka dhacday qiyaastii 70 kiiloomitir koonfur-bari kaga beegan magaalada Bosaso, gaar ahaan deegaanada Togga Baallade iyo silsiladda buuraha Al-Miskaad, halkaas oo howlgalka Hilaac uu ka socday tan iyo December 2024.

Milateriga Mareykanka ayaa sheegay in howlgalka lagu fuliyay iskaashi lala yeeshay dowladda federaalka Soomaaliya iyo ciidamada ammaanka ee dalka, iyadoo ujeeddadu tahay in la wiiqo awoodda howlgal ee kooxda ISIS isla markaana la yareeyo khataraha ka dhan ah shaqaalaha Mareykanka, danahooda iyo xulafadooda.

“Faahfaahin gaar ah oo ku saabsan cutubyada iyo qalabka la adeegsaday lama shaacin doono si loo ilaaliyo amniga howlgalka,” ayaa lagu yiri bayaanka AFRICOM.

Kooxda ISIS-Somalia, oo ah farac yar balse sii kordhaya oo ka tirsan Islamic State, ayaa inta badan ka howlgasha dhulka buuraha leh ee Puntland, halkaas oo ay marar badan isku dhaceen ciidamada ammaanka ee maamulkaas sanadihii la soo dhaafay.

Duqeyntan ayaa timid xilli maamulka Puntland uu la sheegay inuu wax ka beddelay howlgaladiisa dhulka ee ka socda aaggaas. Mas’uuliyiin goboleed ayaa sheegay in qaar ka mid ah dagaalyahannada ISIS ay ku go’doonsan yihiin buuraleyda kadib markii la jaray waddooyinkii sahayda.

Ilo amni oo ka tirsan Puntland ayaa sidoo kale sheegay in kooxda ay hore ugu tiirsanayd shabakado qarsoodi ah oo u suurtagelin jiray in cunto iyo xoolo lagu soo geliyo xeryo fogfog oo ku yaalla buuraleyda.

Mareykanka ayaa marar badan duqeymo cirka ah ka fuliya Soomaaliya, isagoo bartilmaameedsada kooxaha Islamic State in Somalia iyo al-Shabaab, kuwaas oo weli ka mid ah khataraha ugu waaweyn ee amni ee dalka.

GAROWE ONLINE