Soomaaliya oo Algeria uga qeybgashay tababar la xiriira Golaha Ammaanka

Xubinnimada aan joogtada ahayn Soomaaliya ee Golaha Ammaanka ee Qaramada Midoobay ayaa bilaabanaysa Janaayo 2025.

MUQDISHO, Soomaaliya - Wasiirka Arrimaha Dibadda iyo Iskaashiga Caalamiga, Danjire Axmed Macalin Fiqi, ayaa ka qeyb galay Shirka 11-aad ee Nabadda iyo Amniga Afrika.

Danjire Axmed Macalin Fiqi ayaa intii uu socday shirka waxaa uu kulan laba geesood ah la qaatay Axmed Attaf, Wasiirka Arrimaha Dibadda ee Aljeeriya, Jaaliyadaha dibadda, iyo arrimaha Afrika.

Labada dhinac ayaa ka wada hadlay sidii loo xoojin lahaa xiriirka ka dhexeeya Soomaaliya iyo Aljeeriya, iyo sidii looga wada shaqayn lahaa arrimaha Gobolka, iyo sidoo kale u diyaar garowga Soomaaliya ee xubinnimada aan joogtada ahayn ee Golaha Ammaanka ee Qaramada Midoobay, oo la filayo inuu bilowdo Janaayo 2025.

Kulanka ayaa waxaa lagu bogaadiyay sumcadda sii kordheysa ee Soomaaliya ee diblomaasiyadda caalamiga ah iyo sida ay uga go'an tahay horumarinta nabadda, Amniga, iyo iskaashiga Arrimaha Afrika.

GAROWE ONLINE