Soomaaliya oo ka hadashay Turki "lagu xasuuqay" Iraq

MUQDISHO, Soomaaliya – Dowladda federaalka ah ee Soomaaliya ayaa ka tacsiyeysay dil 13 qof oo u dhashay Turkiga ay kooxda PKK ugu geysteen waqoyga Ciraaq, falkaas oo xukuumadda Ankara ay ku qeexdey "xasuuq wadareed".

Sidda uu daabacay wargeyska Daily Sabaax, xukuumadda Muqdisho ayaa kamid ah dalalka dhambaalka tacsida ah la wadaagay Ankara kadib ficilkaas oo dhacay todobaadkan markii kooxda PKK ay qafaalatay shaqsiyaadkaas.

Lama ogga goobta ay dowladda Soomaaliya u marisay Turkiga tacsidaas maadaama uusan jirin qoraal rasmi ah oo kasoo baxay Wasaaradda Arrimaha Dibadda ama Madaxtooyadda Soomaaliya.

Dadkaas la laaley waxaa ku jira saraakiil boolis iyo milatari, sidda ku xusan warbixinadda oo intaas ku daraya in la khaarijiyey xilli ciidanka Turkiga ay wadeen howlgal ay doonayeen in ay kusoo badbaadiyaan muwaadiniintaas.

Turkiga ayaa bishaan bilaabay hawlgal militari oo ka dhan ah saldhigyada PKK ee waqooyiga Ciraaq oo Erdogan uu sheegay Isniintii in loogu talagalay qayb ka mid ah sii deynta 13 qof ee la qafaashay.

Ugu yaraan 48 xubnood oo ka tirsan kooxda hubeysan ee Kurdiyiinta ayaa sidoo kale lagu dilay howlgalka, sida uu sheegay wasiirka difaaca ee Turkiga.

PKK, oo ay ku tilmaameen koox "argagixiso" Mareykanka iyo xulafada kale ee reer galbeedka ee Turkiga, ayaa wadda kacdoon hubaysan oo ka dhan ah dowladda Turkiga tan iyo sanadkii 1984 waxaana la rumeysan yahay in ay dileen tobanaan kun.

GAROWE ONLINE