Soomaaliya oo loo iibinayo sheybaarka lagu ogaado COVID-19

MUQDISHO, Soomaaliya – Dowlada Talyaaniga ayaa Isniinta maanta ah waxay ku dhawaaqdey in ay dhigeeda Soomaaliya ugu deeqdey aduun lacageed dhan in ka badan 215-kun oo Doolar-ka Mareykanka ah.

Barta Twitter-ka ee safaaradda Talyaaniga ee Muqdisho ayaa lagu xaqiijiyey in kaalmadaas ay maamuli doonto Hay'adda Caafimaadka Aduunka ee loosoo gaabiyo magaceeda WHO faraceeda Soomaaliya.

Sidda lagu sheegay qoraalka safaaradda, lacagtaas waxaa lagu hirgelin doonaa sheybaarka lagu ogaado caabuqa Coronavirus.

"Waqtiyadda aadka u adag waa in aan ka midaysanahay halista guud," ayaa lagu soo gabagabeeyay qoraalka kooban ee safaaradda.

Ma cadda hadii lacagta ay xukuumadda Roma bixisay ay ku filan tahay soo iibinta sheybaarka ama in loo baahnaan doono qiimo kale.

Ra'iisul Wasaare Xasan Cali Khayre ayaa asbuucii hore shaaciyey in xukuumaddu u qoondeysay la tacaalida cudurkaas shan milyan oo Doolar.

Talyaaniga waa wadanka ugu badan ee geerida uu ka sababay Coronavirus. Wadarta guud ee dhimashadda ayaa mareysa 63,928. Kaliya maanta, mas'uuliyiinta waxay soo wariyeen 602 oo geeri ah.

Soomaaliya gaar ahaan Muqdisho oo laga xaqiijiyey hal kiis oo fayruskaas ah ayaanan wali lasoo warin wax geeri ah.

Wasaaradda Caafimaadka ayaa qirtay in caqabadaha haysta ay kamid tahay dalka oo aanu haysan agabka loogu tagalay baaritaanka.

Kaalmada ay soo bandhigtay Talyaaniga ayaa bilow u ah balanqaadyo kale oo dalal ay kamid yihiin Shiinaha iyo Qadar ay sameeyeen, sidda ay ka dhawaajisay Fowziya Abiikar Nuur, wasiirka caafimaadka Soomaaliya.

GAROWE ONLINE