Soomaaliya oo waayi karta codka Qaramada Midoobay
-
WARIYAHA WASHINGTON GAROWE ONLINE
- Posted On 19-01-2021, 12:46PM
WASHINGTON, US – Soomaaliya ayaa kasoo dhex-muuqatay liiska 10 dal oo Qaramada Midoobay soo bandhigtay kuwaas weyn kara codka ay ku leeyihiin Fadhiga loo-dhan yahay ee Jamciyada Qurumaha Ka Dhaxeysa.
Sidda laga soo xigtay faafinta UN-ka oo soo baxdey todobaadkan, sababta ay wadamadan Soomaaliya safka hore kaga jirto u weyn karaan xuquuqda codkooda ayaa ah in aysan bixin qaaraanka sanadlaha ah ee golahan.
Soomaaliya oo ay wehliyaan 8 kale oo Afrikaan ah iyo Jamhuuriyadda Islaamiga Iiraan ayaa ah dalka labaad ee ugu leeyahay lacagta ugu badan.
Wadamadan ayaa kala ah;
Iiraan waxaa lagu leeyahay; $16,251,298
Soomaaliya waxaa lagu leeyahay; $1,443,640
Comoros waxaa lagu leeyahay; $871,632
Sao Tome and Principle waxaa lagu leeyahay; $871,888
Libya waxaa lagu leeyahay; $705,391
Congo waxaa lagu leeyahay; $90,844
Zimbabwe waxaa lagu leeyahay; $81,770
Central Africa Republic waxaa lagu leeyahay; $29,395
South Sudan waxaa lagu leeyahay; $22,804
Niger waxaa lagu leeyahay; $6,733
Qaaraanka Qaramada Midoobay oo si sanadle ah loo bixiyo ayaa lagu kabaa miisaaniyadda howlgalada ururka, waana waajib la dhiibo.
Antonio Guterres, xoghyaha guud ee Qaramada Midoobay, ayaa Isniintii wuxuu sheegay in xayiraada coddeynta ee la saarey wadamadan ay waafaqsan tahay Axdiga lagu aas-aasay ururkan jaangooya siyaasadda aduunka.
Guterres oo warqada coddeynta looga hakiyey wadamadan soo saarey ayaa u diray madaxweynaha Golaha loo-dhan yahay, Volkan Bozkir, kaasoo u dhashay waddanka Turkiga isla markaana dhaqan-gelinaya go’aankaas.
Dowladda Soomaaliya ee fadhigeedu yahay magaaladda Muqdisho iyo howlgalkeeda Qaramada Midoobay ayaan wali ka hadlin arrintan.
Coddeynta fadhiga loo-dhan-yahay ee Qaramada Midoobay ayaa leh muhiimad gooni ah marka ay soo baxayaan qaraarada saameynaya aduunka wallow uu kasii culus yahay go’aanka kasoo baxay Golaha Ammaanka ee ururka.
GAROWE ONLINE
