Taliyihii booliska degmadda Afgooye oo qarax lagu dilay
-
WARIYAHA MUQDISHO GAROWE ONLINE
- Posted On 22-03-2020, 06:45PM
AFGOOYE, Koonfur Galbeed – Taliyihii booliska saldhiga degmada Afgooye ee gobolka Shabeellaha Hoose ayaa waxaa lagu dilay qarax, sidda ay bogga Garowe Online u xaqiijiyeen mas'uuliyiinta ammaanka.
Cabdiqaadir Cusmaan Nuunow iyo saddex kale oo ilaalo u ahayd ayaa ku dhintay miino haleeshay kolanyo ay la socdeen oo mareysay inta u dhaxeysa Caawa Cabdi iyo Lafoole, galabnimadii maanta.
Goobjoogeyaal ayaa khadka telefoonka ugu sheegay warsidaha GO in askar kale oo kamid ahayd kolanyadda ay soo gaareen dhaawac.
Maleeyshiyaadka Al-Shabaab ee gacansaarka la leh shabakada argagixisadda ah ee Al-Qaacida ayaa looga bartay dhacdooyinka noocaan ah.
Maamulka Koonfur Galbeed oo si kooban uga hadlay falkaas ayaa sheegay in uu cambaareynayo, isla markaana uu tacsi u dirayo ehelka taliyaha iyo askarta kale ee ku geeriyootay "falkaas argagixiso".
Afgooye, oo 30 KM dhanka Koonfur Galbeed kaga beegan Muqdisho, ayaa bilooyinkii lasoo dhaafay waxay xarun muhiim ah u ahayd howlgalada Ciidamada Kumaandooska.
Milatariga Soomaaliya ayaa dhowaanahaan ku howlahaan xoreynta gobolka oo Al-Shabaab ay haatan si buuxda kaga haystaan degmooyinka Kuntuwaarey iyo Sablaale, oo la sheegay in ciidamada kusii jeedaan.
GAROWE ONLINE
