Trump oo Amar ku Bixiyay in Gujisyada Niyukleerka u dhaqaaqaan dhanka Ruushka

Washington – Madaxweynaha Mareykanka Donald Trump ayaa Jimcihii ku dhawaaqay inuu amar ku bixiyay in laba gujis oo niyukleer xambaarsan u dhaqaaqaan dhanka Ruushka, kaddib hadallo uu ku tilmaamay kuwo hanjabaad, oo ka yimid Dmitry Medvedev, madaxweynihii hore ee Ruushka, haatanna ah ku-xigeenka Golaha Amniga Qaranka ee dalkaasi.

Trump ayaa arrintan ku shaaciyay bartiisa Truth Social, isagoo sheegay in hadallada Medvedev ay ahaayeen kuwo “si weyn uga xanaajiyay” isla markaana keeni kara jawaab degdeg ah. Wuxuu intaas ku daray in ereyada noocaas ahi aysan ahayn kuwo la iska indha tiri karo, maadaama ay sababi karaan “cawaaqib aan la saadaalin karin.”

Medvedev, oo tan iyo bilowgii dagaalka Ukraine noqday mid hadalkiisu sii kululaanayo, ayaa si caqli celin leh uga jawaabay hadalka Trump. Wuxuu sheegay in haddii Trump uu si weyn uga falceliyay hadalladiisa, ay taasi muujinayso in Ruushku "ku socdo jidkii saxda ahaa."

Trump ayaa sheegay in Mareykanku uu diyaar u yahay inuu ka hortago wax kasta oo khatar ku ah nabadda caalamka, balse wuxuu rajeeyay in xaaladda aysan sii cakirmeyn. Illaa hadda ma cadda halka loo raro gujisyada niyukleerka ah ama haddii amarku yahay mid ujeeddo milatari oo degdeg ah leh.

Tallaabadan ayaa imaneysa iyadoo ergay gaar ah oo uu Trump u diray Moscow, Steve Witkoff, uu ku howlan yahay inuu horumariyo wada-xaajoodyo lagu gaarayo xabbad-joojin Ukraine. Mareykanka ayaa sheegay inuu cunaqabateyn cusub saari doono Ruushka haddii aan wax horumar ah laga keenin wada-hadallada muddo 10 maalmood gudahood ah.

Xiisadda u dhexeysa Trump iyo Medvedev ayaa ah mid sii xoogeysaneysa, iyadoo ay horey dhowr jeer isugu jawaabeen si kulul baraha bulshada, taasoo muujinaysa sida siyaasadda caalamka ay u saameyn karaan dagaalka ereyada iyo loollanka shakhsiyeed.

GAROWE ONLINE