Turkiga oo qabtay in ka badan boqol muhaajiriin ay Soomaali ku jiraan
-
WARIYAHA ANKARA GAROWE ONLINE
- Posted On 08-09-2020, 07:00AM
ANKARA, Turkey – Ciidamada ilaalada xeebaha Turkiga ayaa Isniintii waxay meel ka baxsan xeebta Mediterranean ku qabteen ugu yaraan 165 soo galooti sharci darro ah kuwaasoo ay ku jiraan tobanaan Soomaali ah.
Wakaalada wararka Anadolu ayaa warisay in muhaajiriinta ay kasoo kala jeedaan Soomaaliya iyo Afghanistan ayna kusii jeedeen Yurub. Degmada Kumluca ee gobolka Antalya ayay xustay lagu xiray.
Wararka qaar ayaa tirada muhaajiriinta gaarsiinaya 190 isla markaana ay damacsanaayeen in ay galaan wadanka Gariiga. Warbixinada waxay tibaaxayaan in la qabtay markii ay ka cilowdey doontii.
Mareega Sonhaber.com ayaa intaas ku daraya in soo galootigaan ay kasoo kala jeedaan Afghanistan, Pakistan, iyo Iiraan.
Tan iyo bilowgii sanadkan, tiro dhan 15,535 oo qaxooti ah ayaa isku dayey in ay galaan Yurub, iyagoo u maraya Turkiga. Xagaagii hore 2019 tirada isku daygaas sameysay waxay gaareysay 29,279.
Macluumaadkaan uu faafiyey Taliska Ciidamada Ilaalada Xeebaha Turkiga ayaa muujinaya in qulqulka qaxootiga uu xawli yahay.
Turkiga oo martigeliyey ku dhowaad 4 milyan oo qaxooti Suuriyaan ah ayaa horey u sheegay in uusan gabaad-siin doonin qaxooti kale, isagoo dalalka Yurub ku tartarsiiyey in ay qaataan mas'uuliyad balaaran.
Midowga Yurub iyo Turkiga ayaa Maaj, 2016 waxay ku heshiiyeen in ay joojiyaan qulqulka qaxootiga sharci darada ah. Balse, waxaa muuqaneysa in uusan heshiiskaas dhaqan-gelin, taasoo xukuumada Ankara ka careysiisay.
GAROWE ONLINE
