USA: shirkadaha xawaaladaha Soomaalida oo berri dib loo furayo

February 28, 2015 (GO)- Maalinta berri ah ayaa lagu wadaa inay dib u shaqo bilaabaan shirkadaha xawaaladaha Soomaalida ee ka hawlgala dalka Maraykanka.

Cabdicasiis Sugule oo ah guddoomiyaha urur ay ku bahoobeen xawaaladuhu oo la yiraahdo SAMSA ayaa sheegay in si rasmi ah berri shaqadu furmi doonto.

Bankiga Merchants oo ah midka ugu weyn ee xawaaladaha Soomaalidu lacagaha dhigtaan ayaa bishan horraanteedii shaaciyey inuu xiri doono dhammaan akoonada shirkada ka shaqeeya dirista lacagaha.

Go'aanka Merchants wuxuu salka ku hayey walaaca laga qabo in lacagaha Soomaaliya loo dirayaa ku dhacaan gacmo khaldan loona adeegsado taageerista kooxaha xagjirka ah gaar ahaan ururka Al-shabaab.

Malaayiin doollar ayaa bil kasta Soomaaliya dibadaha looga soo diraa, lacagtaasoo badankeedu ka timaadda dalalka Yurub iyo Maraykanka waxay qeyb weyn ka qaadataa koboca dhaqaalaha maxalliga ah.

Tobannaan kun oo qoys oo Soomaali ah ayaa si toos ah ugu tiirsan taageerada dhaqaale ee ay ka helaan eheladooda ku nool qurbaha, waxaana joojinta shaqada xawaaladaha Soomaalidu ciriiri gelisey nolosha dad badan.

GAROWE ONLINE