Villa Somalia oo go'aan ka gaartay qofka noqonaya Madaxweynaha xiga ee Koonfur Galbeed

MUQDISHO, Soomaaliya — Guddoomiyaha Golaha Shacabka ee Baarlamaanka Federaalka Soomaaliya, Sheekh Aadan Maxamed Nuur (Madoobe), ayaa hadda loo arkaa shakhsiga ugu dhow ee la wareegi doona hoggaanka sare ee maamulka Koonfur Galbeed.

Tallaabadan ayaa timid ka dib markii uu qabsoomay heshiis hoose oo dhex maray madaxda Dowladda Federaalka iyo xubnaha ugu miisaanka culus mucaaradka ee u ololeynayay in xilka laga tuuro madaxweyne Cabdicasiis Xasan Maxamed (Laftagareen).

Ilo wareedyo xog-ogaal ah ayaa xaqiijiyay in Sheekh Aadan Madoobe, oo xulufo dhow la ah Madaxweyne Xasan Sheekh Maxamuud, lagu heshiiyay inuu noqdo hoggaamiyaha xiga ee Koonfur Galbeed si loo soo afjaro ismari-waaga siyaasadeed ee ragaadiyay gobolka.

Go’aankan ayaa lagu gaaray kulamo xiriir ah oo maalmihii u dambeeyay ka socday magaalada Muqdisho, kuwaas oo looga gol-leeyahay in lagu jaangooyo mustaqbalka maamulkaas ka hor inta aan la gaarin doorashada.

Isbeddelkan ayaa imaanaya xilli magaalada Baydhabo ay ka jirto jawi kacsan oo ay sababeen loolan awoodeed iyo dhaqdhaqaaqyo ciidan oo iska soo horjeeda. Khilaafka u dhexeeya madaxtooyada federaalka iyo maamulka Laftagareen ayaa gaaray heer dowladda dhexe ay taageero u raadiso garabka isbeddel-doonka si loo beddelo hoggaanka hadda jira.

Heshiiskan cusub ayaa loo arkaa mid si weyn u beddeli doona jihada siyaasadeed iyo nabadgelyo ee Koonfur Galbeed, iyadoo la filayo in Sheekh Aadan Madoobe uu door muhiim ah ka ciyaaro isu-keenista dhinacyada iska soo horjeeda iyo dajinta xaaladda magaalada Baydhabo oo muddooyinkan ahayd mid aan fadhin.

GAROWE ONLINE