Wadahadalkii Dowladda Federaalka iyo Somaliland oo dib u dhacey
-
- Posted On 26-02-2015, 11:26AM
February 26, 2015 (GO)- Waxaa dib u dhacay wadahadalladii u socdey Dowladda Federaalka Soomaaliya iyo maamulka Somliland oo qorshuhu ahaa inay maanta ka furmaan magaalada Istanbul ee dalka Turkiga.
Sababaha keenay dib u dhaca lama shaacin, balse mas'uuliyiin ka tirsan Somaliland ayaa sheegay in shirku si rasmi ah u furmi doono maalinta Axadda ee taariikhdu ku beegan tahay kowda bisha March.
Kulankii ugu dambeeyey ee Dowladda Federaalka iyo Somaliland yeeshaan oo ka dhacay magaalo madaxda dalka Jabuuti, waxaa qodobadii lagu heshiiyey kamid ahaa in lasii dardargeliyo wadahadallada kulanka xigana laysugu yimaado February 26, 2015.
Madaxweynaha Dowladda Federaalka Xasan Sheekh Maxamuud iyo Madaxweynaha Somaliland Axmed Maxamed Siilaanyo ayaa heshiiskaas qalinka ku duugey, waxaana qodobada kale ee hishiiskaasi dhigayey ugu muhiimsanaa:
- In la dar dar geliyo wada hadallada labada dhinac waqtina lagu jaan gooyo.
- In arrimaha siyaasadda ee masiiriga ah lagu dhiirrado lana fuliyo waxyaabihii horay loogu heshiiyey.
- In laga dhowrsado wax walba oo wada hadallada carqalad gelin kara.
- In aan la siyaasadeyn deeqaha bini aadamnida iyo mashaariicda horumarinta balse la dhiiri geliyo.
- In la fuliyo heshiiskii maamulka hawada.
- In kulammada hadii labada dhinac raali ka yihiin laga soo qayb gelin karo khubaro farsamo iyo dowlado saaxiib ah.
- In ergooyinka labada dhinac kulanka kan xiga ku yeeshaan magaalada Istanbul ee dalka Turkiga 26/27 February, 2015.
GAROWE ONLINE
