Wasiiru-dowle loo xil-saarey arrimaha doorashooyinka
-
WARIYAHA MUQDISHO GAROWE ONLINE
- Posted On 13-01-2021, 10:35AM
MUQDISHO, Soomaaliya - Ra'iisul Wasaaraha dalka Soomaaliya, Maxamed Xuseen Rooble, ayaa xil sare lana xiriira arrimaha doorashooyinka 2020-21 wuxuu u magacaabay wasiiru-dowlaha xafiiskiisa.
Cabdixakiim Xasan Ashkir ayaa, sidda ku xusan war-saxaafadeedka, wuxuu Rooble u wakiishay in uu dardargeliyo arrimaha ku aadan coddeynta heer Qaran ee loo balansan yahay.
"Hadaba, wasiiru-dowlaha xafiiska Ra'iisul Wasaaraha wuxuu mas'uul ka yahay isku-xirka iyo wadashaqeynta xukuumadda JFS, Dowladaha xubnaha ka ah dowladda federaalka, Hay'addaha Caalamiga iyo dhamaan howlaha la xiriira habsami socodka howlaha Doorashooyinka," ayaa lagu soo xiray qoraalka.
Magacaabidan ayaa imaaneysa xilli is-faham-waaga ka taagan doorashooyinka uu culus yahay isla markaana dedaaladii ugu dambeeyay ee xalka loogu goobayey uu fashil kusoo dhamaadey.
Ma cadda talaabada xigta ee la qaadi doono. Madaxweynaha Koonfur Galbeed, Cabdicasiis Laftagareen ayaa la sheegay in uu isku dayo in uu miiska wadahadalka isugu keeno dhinacyada is-diidan.
Inkasta oo maamulkiisa u jaranjeero Villa Soomaaliya, haddana musharaxiinta ayaa horey u sheegay in aysan Laftagareen kaligii ku haleyn doonin xalka ayna dhankooda ka dedaali doono.
Beesha Caalamka oo xalay war-saxaafadeed soo saartey ayaa daaha ka rogtay in aysan aqbaleyn isbedel lagu sameeyo heshiiskii September isla markaana wadahadal ugu yeertay hogaamiyeyaasha dalka.
Hoos ka akhriso qoraalka bayaanka
GAROWE ONLINE
