Weeraro ka dhici lahaa Muqdisho oo laga hortagay

MUQDISHO — Hay’adda Sirdoonka iyo Nabadsugidda Qaranka (NISA) ayaa sheegtay inay qabatay shan ka tirsan Al-Shabaab, kuwaas oo lagu eedeeyay inay qorsheynayeen inay gudaha u galaan Muqdisho si ay weeraro uga fuliyaan caasimadda.

War-saxaafadeed ay soo saartay NISA ayaa lagu sheegay in xiritaannadan ay ka dambeeyeen howlgallo sirdoon oo si taxaddar leh loo qorsheeyay, kadib markii hay’addu si dhow ula socotay dhaqdhaqaaqyada shabakadan oo qayb ka ah Al-Shabaab.

Hay’adda ayaa sheegtay inay gacanta ku dhigeen walxo qarxa, hub iyo gaadiid la aaminsan yahay in loo diyaariyay weerarada argagixisada. Lama shaacin faahfaahin dheeraad ah oo ku saabsan goobaha la xiray iyo bartilmaameedyada ay falalkaasi ku beegnaayeen.

NISA waxay sheegtay in dadka la xiray loo gudbin doono hay’adaha garsoorka si loo marsiiyo sharciga Jamhuuriyadda Federaalka Soomaaliya.

Hay’adda ayaa sidoo kale ku amaantay bulshada Soomaaliyeed kaalinta ay ka qaateen ka hortagga falkaas, iyadoo dadweynaha ugu baaqday inay sii wadaan la socodka iyo gudbinta macluumaadka la xiriira hanjabaadaha amni.

Al-Shabaab, oo xiriir la leh Al-Qaacida, ayaa dhowr jeer ka fulisay weeraro Muqdisho iyo guud ahaan Soomaaliya, iyagoo bartilmaameedsada hay’adaha dowladda, ciidamada ammaanka iyo shacabka rayidka ah.

Dowladda Soomaaliya, oo kaashanaysa la-hawlgalayaasha caalamiga ah, ayaa xoojisay howlgalada sirdoon iyo kuwa ciidan si loo burburiyo shabakadaha kooxda loona hortago weerarada magaalooyinka.

GAROWE ONLINE