Xamse oo Diiday Inuu Ka Jawaabo Gefka Trump u geysanayo Soomaaliya

MUQDISHO — Ra’iisul Wasaaraha Soomaaliya, Xamse Cabdi Barre, ayaa sheegay in dowladda Soomaaliya ay si ula kac ah uga aamusnay hadallada naceybka iyo naceyb-kicinta leh ee uu maalmahan jeedinayay Madaxweynaha Mareykanka, Donald Trump, isagoo ku tilmaamay “mid aan mudnayn in laga dhigo buunbuunin siyaasadeed.”

Isagoo ka hadlayay Shirka 6aad ee Hoggaaminta iyo Hal-abuurka Dhalinyarada 2025, ayuu Ra’iisul Wasaaruhu sheegay in jawaab celin la siiyo Trump ay sii kordhin lahayd hadalladiisa iyo muranka uu doonayo.

“Trump in aan u jawaabno oo hadalkiisa micne u yeelno waxaa ka dhib yar in aan iska dhaafno. Soomaaliya kaliya ma aflagaadeyn ee dalal badan ayuu wax ka sheegay; Nigeria ayuu ka hadlay, South Africa ayuu ka hadlay. Marka ma aha wax weyn oo muhiim laga dhigo,” ayuu yiri Xamse.

Hadallada sii kordhaya ee Trump ayaa cabsi iyo walaac geliyay Soomaalida ku nool Mareykanka, kuwaas oo sheegay in hadalladiisu sare u qaaday khatarta iyo naceybka ay dareemayaan.

Bayaan Ra’iisul Wasaaraha ayaa yimid saacado kaddib markii Trump mar kale ku celiyay hadallo naceyb iyo kala-sooc ku dhisan oo uu si toos ah ugu weeraray bulshada Soomaalida ee Mareykanka, isaga oo ku tilmaamay “qashin” aan mudnayn in lagu soo dhaweeyo dalkaas.

GAROWE ONLINE