Xasan Sheekh oo ciidamo cusub u diraya Baydhabo si ay u difaacaan Aadan Madoobe

MUQDISHO, Soomaaliya — Dowladda Federaalka Soomaaliya ee mudo-xileedkeedu dhamaaday, ayaa qorsheynaysa in ciidamo cusub loo diro magaalada Baydhabo, si ay uga qeyb qaataan howlgal lagu riixayo xoogagga taabacsan Lafta-Gareen, ee ku sugan duleedka magaalada.

Qorshahan ayaa yimid kadib wada-hadal taleefan oo dhexmaray Xasan Sheekh Maxamuud iyo hoggaamiyaha Koonfur Galbeed Aadan Maxamed Nuur (Aadan Madoobe).

Warbixintu waxay sheegtay in  Xasan Sheekh uu Ciidanka Xoogga Dalka faray inay qaadaan howlgal lagu fogeynayo goobta dagaalka ee ku dhow Baydhabo, isla markaana lagu xoojinayo amniga magaalada.

Xoogagga Lafta-Gareen ayaa toddobaadyadii u dambeeyay dhowr jeer weerarro ka geystay duleedka Baydhabo, iyadoo ciidamada taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen, lagu eedeeyay inay ku sugan yihiin hareeraha magaalada.

Sida warbixintu sheegtay, Aadan Madoobe oo Villa Somalia xukunka xoog ku saartay, ayaa walaac xooggan ka muujiyay joogitaanka ciidamada taageersan Laftagareen, kuwaas oo la sheegay inay weerarro ka soo qaadaan duleedka Baydhabo.

Toddobaadkii hore, dagaalyahanno mucaarad ah ayaa weerar aroornimo ku galay Baydhabo, kaas oo sababay dhimashada dhowr qof oo uu ku jiray taliye ka tirsanaa maamulka gobolka, ka hor inta aysan dib uga gurin magaalada.

Weerarrada ayaa sare u qaaday xiisadda siyaasadeed iyo amni ee Koonfur Galbeed, iyadoo Baydhabo ay noqotay goob muhiim u ah loollanka u dhexeeya dowladda federaalka iyo xoogagga taageersan Laftagareen.

Dagaallada ka socda Baydhabo ayaa sidoo kale daba socda iska horimaadyo hore oo dhacay bishii Agoosto iyo horraantii Sebtembar. Reuters waxay sheegtay in ciidamada federaalka ay bishii Agoosto xoogagga mucaaradka ka saareen qaybo ka mid ah magaalada kadib dagaallo culus.

Dagaal kale oo dhacay 3-dii Sebtembar duleedka Baydhabo ayaa sababay dhaawaca 71 qof iyo dhimashada hal qof oo rayid ah, sida uu sheegay isbitaalka gobolka Bay, halka dad badan ay guryahooda ka carareen rasaasta culus.

Baydhabo ayaa ah xarun muhiim u ah Koonfur Galbeed iyo goob ay ku nool yihiin boqollaal kun oo qof oo barakacayaal ah, taasoo kordhinaysa walaaca laga qabo saameynta dagaallada cusub ee magaalada iyo dadka rayidka ah.

Xiisadda ayaa salka ku haysa khilaaf siyaasadeed oo muddo dheer u dhexeeyay dowladda federaalka iyo maamulkii Laftagareen. Ciidamada federaalka ayaa dhammaadkii Maarso la wareegay Baydhabo, kaddib markii Laftagareen uu xiriirka kala dhexeynayay Muqdisho iyo maamulkiisa uu muran xooggan ka dhashay.

GAROWE ONLINE