Xasan Sheekh oo dabciyay mowqifkiisa lana kulmaya Abiy Axmed

Waxaa lagu wadaa in wareegga saddexaad ee wadahalada Ankara ay isku arki doonaan laba wafdi.

MUQDISHO, Soomaaliya - Wadahadallo Fool-ka-Fool ah oo Abiy Ahmed Ali dalbadey, Xasan Sheekh-na uu aqbalay ayaa ka furmaya Ankara, Turkey, waxaana dhex-dhexaadinaya Erdogan, si heshiis looga gaaro xiisadda ka dhalatay heshiiska Badda.

Madaxwayne Xasan Sheekh oo ka qeybgalaya kulankan ayaa maanta u socdaalay Turkiga, sidda uu xaqiijiyay telefishinka dowlada oo qoraal kooban kasoo saarey safarkan.

HOOS KA AKHRISO QORAALKA

Madaxwaynaha Jamhuriyadda Fedraalka ah ee Soomaaliya Mudane Dr. Xasan Shiikh Maxamuud ayaa u safray Magaalada Ankara ee Dalka Turkiga, kadib casuumad rasmi ah oo uu ka helay dhiggiisa dalkaas Mudane Rejeb Dayib Erdugaan.

Dawladda walaalaha aan nahay ee Turkiga ayaa wadday dadaal iyo wadahadal xal loogu raadinayo xiisadii ka dhex aloosanayd Dawladda Soomaaliya iyo Itoobiya ee ka dhalatay heshiiskii isafgaradka sharci darrada ahaa.

Waxaa lagu wadaa in wareegga saddexaad ee wadahalada Ankara ay isku arki doonaan laba wafdi oo ay kala hogaaminayaan madaxweynaha JFS iyo Ra’iisul Wasaaraha Itoobiya.

Dawladda Soomaaliya oo gudanaysa waajibka ka saaran ilaalinta Madax-banaanida iyo midnimada Soomaaliya ayaa mowqifkeedii hore ku taagan, kaasoo saldhig ay u tahay in aanay wax gorgortan ah ka gali doonin ilaalinta Midnimada iyo madax-banaanida Jamhuuriyadda federaalka ah ee Soomaaliya.

GAROWE ONLINE