Xasan Sheekh oo Diblomaasiyiinta Ajnabiga gaarsiiyay Fariin ku saabsan qorshihiisa doorashadda

MUQDISHO, 8-da Luulyo 2025 – Dowladda Federaalka Soomaaliya ayaa si cad u diiday in mar kale lagu laabto nidaamka doorashada dadban, iyada oo markale ku celisay in ay ka go’an tahay hirgelinta nidaamka hal qof, hal cod, intii lagu guda jiray wadahadallo ay la yeelatay kooxda C6+ ee beesha caalamka, sida ay u xaqiijiyeen ilo diblomaasiyadeed warbaahinta Garowe Online.

Saddex wasiir oo uu Madaxweynaha Soomaaliya, Xasan Sheekh Maxamuud, u magacaabay wadahadallada mucaaradka — Wasiirka Arrimaha Gudaha Cali Xoosh, Wasiirka Cadaaladda Xasan Macallin iyo Wasiirka Waxbarashada Faarax Cabdulqaadir — ayaa la kulmay wakiillo ka tirsan C6+, oo ka kooban Qaramada Midoobay, Midowga Afrika, Midowga Yurub, Mareykanka, UK iyo IGAD.

Ilo xog-ogaal u ah kulanka ayaa sheegay in wasiirradu si adag u muujyeen in wax ka beddelka dastuurka uu yahay awood dastuuriga ah oo gaar u ah dowladda, isla markaana ay diideen baaqyada lagu doonayo in dib loogu laabto nidaamkii hore ee doorashada dadban oo ku salaysnaa hab beeleed.

Wadahadalladan ayaa yimid xilli siyaasadda dalka ay aad u kacsan tahay, kadib kulan kale oo 5-tii Luulyo ka dhacay xerada Xalane ee Muqdisho, halkaas oo ay beesha caalamka kula kulmeen Golaha Mucaaradka — urur ka kooban siyaasiyiin iyo madax hore oo dhaliilsan habka dowladda u waddo isbeddelka doorashooyinka.

Beesha caalamka weli kama aysan bixin war rasmi ah oo ku saabsan labada kulan midkoodna. Si kastaba, diblomaasiyiin arrintan ku dhow ayaa sheegay in C6+ ay si dhow ula socoto xaaladda, balse aysan weli muujin wax isbeddel ah oo ku saabsan mowqifkeeda ama dhexdhexaadinteeda.

Khilaafka ayaa muujinaya kala duwanaansho baahsan oo ku saabsan mustaqbalka siyaasadeed ee Soomaaliya, iyadoo dowladda Federaalka ay ku adkaysanayso isbeddello doorasho oo qayb ka ah qorshaha ay ku dhiseyso hay’adaha Federaalka. Hase yeeshee, mucaaradka ayaa ka digay in la hareer maro wadatashiga ku saabsan dastuurka, taasoo ay sheegeen in ay khatar gelin karto xasilloonida siyaasadeed ee dalka.

Soomaaliya ayaa muddo dheer ku tiirsanayd nidaam doorasho oo dadban, oo ay odayaasha dhaqanka ku doortaan xubnaha baarlamaanka. Balse Madaxweyne Xasan Sheekh ayaa ballan qaaday in la hirgelinayo nidaamka cod-bixinta tooska ah, inkasta oo xukuumaddiisu aysan si buuxda u maamulayn dalka intiisa badan, islamarkaana ay wajahayso caqabado ay ka mid yihiin khilaafka dowlad-goboleedyada iyo halista Al-Shabaab.

GAROWE ONLINE