Xasan Sheekh oo mar kale weerar afka ah ku qaadey Itoobiya

Madaxweynaha Soomaaliya ayaa hadalkan waxa uu ka sheegay Madasha Diblumaasiyadda Antalya.

ANKARA, Turkey - Madaxweynaha dowladda federaalka ah ee Soomaaliya Xasan Sheekh Maxamuud ayaa waxa uu ka qeyb-galay Madasha Diblumaasiyadda Antalya ee dalka Turkiga.

Xasan Sheekh ayaa ka hadlay mustaqbalka wanaagsan ee Soomaaliya iyo muhiimadda ay leedahay xasilloonida marinnada muhiimka ah ee ay ka mid tahay Badda Cas.

Aragtida Dowladda Federaalka Soomaaliya ee daris-wanaagga iyo iskaashiga ku saleysan is-ixtiraamka iyo dheef-wadaagga ayuu si weyn ugu soo bandhigay madashan.

Xasilloonida dalalka dhaca Badda Cas ayuu xusay in ay aas-aas u tahay nabadda iyo ganacsiga caalamiga ah, sidaas awgeed dowladda Soomaaliya ay mudnaan siinayso iskaashiga iyo xasillooni gobolka.

Xadgudubka Xukuumadda Itoobiya ay ku sameynayso midnimada iyo madaxbannanida Soomaaliya ayuu carabka ku adkeeyay in ay wiiqayso dadaallada caalamiga ah ee xasilinta marinnada muhiimka ah ee ay ka mid tahay Badda Cas.

Dhammaan qodobbada mala-awaalka ah ee ay ku marmarsiyoonaysay Xukuumadda Itoobiya kuwaas oo ay ku doonayaan in ay ku xalaashadaan Baddeena ayuu si weyn u beeniyay.

Xoreynta deegaannada ku jira gacanta argagixisada ayuu tibaaxay in ay barbar socdaan qorsheyaal lagu adkeynayo dowladnimada, laguna xoojinayo iskaashiga iyo doorka Soomaaliya ee Gobolka, kuwaas oo ay ka mid yihiin; ku biirista Dallada Bulshada Bariga Afrika, qaadista cunaqabateynta hubka iyo dhammeystirka deyn cafinta.

GAROWE ONLINE