Xasan Sheekh oo Mucaaradka ku Eedeeyay Inay Carqaladeynayaan Doorashooyinka Dadweynaha

MUQDISHO, Soomaaliya – Madaxweynaha Soomaaliya Xasan Sheekh Maxamuud ayaa si kulul u eedeeyay siyaasiyiinta mucaaradka, xildhibaano, madax goboleedyo iyo madax hore oo uu ku tilmaamay kuwo carqaladeynaya hirgelinta nidaamka doorashada hal qof, hal cod. Madaxweyne Xasan ayaa uga digay in dalka dib loogu celiyo doorasho dadban, taasoo uu sheegay inay keeni karto xasillooni darro siyaasadeed.

Madaxweynaha oo ka hadlayay xuska maalinta dhallinyarada Soomaaliyeed oo lagu qabtay Muqdisho ayaa difaacay isbeddellada doorasho ee dowladda uu hoggaamiyo. Wuxuu sheegay in shacabka Soomaaliyeed ay maanta gacanta ku hayaan awoodda dalka, lagana baxay xilligii siyaasiyiinta uun ay go'aaminayeen mustaqbalka qaranka.

Xasan Sheekh wuxuu sheegay in diiwaangelinta codbixiyeyaasha ay si rasmi ah uga bilaabatay caasimadda, islamarkaana la diyaariyay sharciyo iyo hannaan doorasho oo fududeynaya doorasho toos ah. Wuxuu ku tilmaamay arrintan mid muhiim u ah horumarka dimuqraadiyadda Soomaaliya, kadib tobannaan sano oo nidaam beeleed lagu dooran jiray xildhibaanada.

Hadalka madaxweynaha ayaa yimid maalmo uun kadib markii 103 xildhibaan oo ka tirsan baarlamaanka federaalka ay si wadajir ah ugu baaqeen inuu xilka iska casilo. Xildhibaanada ayaa ku eedeeyay Madaxweyne Xasan in uu burburiyay Golaha Wadatashiga Qaran (GWQ), uu faragelin ku sameeyay dowlad goboleedyada sida Puntland iyo Jubbaland, iyo inuu si gaar ah u adeegsaday hantida dowladda si uu u horumariyo xisbi siyaasadeed.

Madaxweyne Xasan Sheekh ayaa sidoo kale si dadban ugu jawaabay qaar ka mid ah siyaasiyiinta mucaaradka oo su’aal geliyay awoodda milateriga Soomaaliya ee dagaalka ka dhanka ah Al-Shabaab. Wuxuu ku tilmaamay hadalladaasi kuwo niyad jabinaya shacabka, una muuqda kuwo u adeegaya argagixisada, isagoo ka digay in siyaasadda lagu cuuryaamiyo dadaallada amniga iyo doorashooyinka.

Iyadoo mucaaradka ay si weyn u dhaleeceeyeen aasaaska Xisbiga JSP ee uu madaxweynaha guddoomiye ka yahay, haddana dowladda federaalka ayaa ku adkeysanaysa inay dalka ka hirgelin doonto doorasho qof iyo cod ah. Si kastaba ha ahaatee, waddada horay loo qaaday waxay u muuqataa mid ay hareeyaan caqabado siyaasadeed, khilaafyo sharci iyo khataro amni oo wali ka imanaya Al-Shabaab.

GAROWE ONLINE