Xiisad siyaasadeed oo ka taagan Muqdisho oo kacdoon shacab berri ka dhacaya

MUQDISHO - Madaxda Mucaaradka Soomaaliya ayaa maanta oo Sabti ah isugu yimid magaalada Muqdisho, iyagoo ku dhowaaqay inay qaban doonaan bannanbax weyn oo loo qorsheeyay maalinta Axadda berri ah, 10-ka May.

Mucaaradka ayaa sheegay inay ka go'an tahay inay qabtaan isu-soo-baxa ay ku muujinayaan aragtidooda siyaasadeed, xilli ay soo baxayaan warar sheegaya in dowladda federaalku ay xiriir la samaysay hoggaamiyeyaasha mucaaradka si looga baajiyo dibad-baxan.

Xiisaddan siyaasadeed ee ka taan Muqdisho ayaa ku soo beegmaysa xilli aad u xasaasi ah, iyadoo maalinta berri ah oo ay bishu tahay 10-ka May lagu wado inay deegaannada Koonfur Galbeed ka dhacaan doorashooyin toos ah.

Dhanka kale, Madaxweynaha Soomaaliya Xasan Sheekh Maxamuud ayaa bilaabay dadaallo wada-hadal ah oo uu ku martiqaaday qaar ka mid ah hoggaamiyeyaasha mucaaradka, si xal looga gaaro caqabadaha hortaagan hannaanka doorashada iyo muranka dastuuriga ah.

Si kastaba ha ahaatee, dadaallada wada-hadalka ee uu hormuudka ka yahay Madaxweyne Xasan Sheekh ayaa u muuqda kuwo aan cagahooda ku taagnayn, maadaama ay jirto kalsooni darro baahsan iyo niyad-sami siyaasadeed oo aan dhex ool dhinacyada iska soo horjeeda.

Mucaaradka ayaa ku eedeynaya dowladda inay doonayso muddo kororsi qarsoon, halka dowladduna ay ku adkaysanayso hirgelinta doorasho qof iyo cod ah, taas oo keentay in jawiga siyaasadeed ee dalku noqodo mid aad u kacsan oo aan la saadaalin karin halka uu ku dambayn doono.

GAROWE ONLINE