Xildhibaan ka tirsan Dowladda Federaalka oo Boorame lagu xiray
-
- Posted On 02-07-2015, 09:24AM
July 2, 2015 (GO)- Booliska Somaliland ayaa magaalada Boorame ee xarunta gobolka Awdal ku xiray xildhibaan ka tirsan baarlammaanka Dowladda Federaalka Soomaaliya.
Xildhibaanka la xiray oo lagu magacaabo Axmed Xuseen Xasan (Sitiin), waxaa xariggiisa warbaahinta u xaqiiiyey Guddoomiyaha Gobolka Awdal- Maxamuud Cali Saleebaan (Rabaax).
Rabaax ayaa sheegay in sababta ka dambeysa xarigga xildhibaankaasi tahay maadaama uu sifo aan sharci ahayn kusoo galay Somaliland, waa sida uu hadalka u dhigaye.
"adeer Somalia iyo Somaliland waa labo dal oo kala gaar ah...xildhibaanku intuusan soo gelin Somaliland waxay ahayd inuu dowladda cafis soo weydiisto" ayuu yiri.
Dhanka kale, guddoomiyaha gobolka Awdal ayaa digniin u direy mas'uuliyiinta xilalka ka haya Dowladda Federaalka ee kasoo jeeda Somalialand, isagoo ku tilmaamay kuwo dhuuni raac ah kuna hanjabay in Somaliland gacan bir ah ku qaban doonto.
Waa markii labaad ee intii lagu guda jirey sanadkan 2015 Xildhibaan Axmed Xuseen Xasan (Sitiin) lagu xiro magalada uu kasoo jeedo ee Boorame.
GAROWE ONLINE
