Xog cusub oo laga helay diyaaradii ku burburtay Garoonka Muqdisho

Muqdisho – Ugu yaraan saddex qof ayaa si degdeg ah looga badbaadiyey diyaarad qumaatiga u kacda oo ku burburtay garoonka diyaaradaha caalamiga ah ee Aden Adde ee magaalada Muqdisho, saakay aroornimadii, xilli ay diyaaradda ku dhawaaqday inay soo degayso.

War-saxaafadeed ka soo baxay Howlgalka Taageerada iyo Xasilinta Midowga Afrika ee Soomaaliya (AUSSOM) ayaa xaqiijiyay in waqtiga shilka oo ahaa 7:30 subaxnimo, ugu yaraan sideed qof ay saarnaayeen diyaaradda.

Diyaaradda ayaa waxaa maamula ciidanka Midowga Afrika ee qeybta ka ah ciidamada Uganda (UPDF), iyadoo kasoo duushay saldhigga milatari ee Balidogle.

Muuqaallo laga duubay goobta shilka ayaa muujinaya shaqaalaha garoonka oo isku dayaya inay damiyaan dabkii ka kacay diyaaradda, iyagoo sidoo kale dhaawacyada qaaday. AUSSOM ayaa sheegtay in hawlgalka raadinta iyo samatabbixinta uu weli socdo si loo soo helo rakaabka iyo shaqaalaha kale ee maqan.

“Diyaarad qumaatiga u kacda oo ay wadaan ciidanka Uganda ee UPDF ayaa si degdeg ah ugu soo degtay garoonka Aden Adde xilli ay kasoo jeedday saldhigga Balidogle,” ayaa lagu yiri war-saxaafadeedka.

“Saddex ka mid ah siddeedii qof ee saarnaa diyaaradda ayaa isla goobta laga badbaadiyey, waxaana loo qaaday isbitaalka AUSSOM si loogu helo daryeel caafimaad. Hawlaha raadinta iyo samatabbixinta ayaa weli socda si loo soo badbaadiyo rakaabka iyo shaqaalaha diyaaradda,” ayaa intaas lagu daray.

Ciidamada UPDF ee qeybta ka ah AUSSOM ayaa muddo labaatan sano ah la shaqeynayay ciidanka nabad-ilaalinta Soomaaliya, iyagoo door muhiim ah ka qaatay hoos u dhigidda dhaqdhaqaaqa ururka Al-Shabaab ee dalka.

Inkasta oo aan weli la ogeyn xaaladda dadka kale ee diyaaradda saarnaa, waxaa la rumeysan yahay inay ku sii jeedaan Muqdisho waqtiga shilka.

Saldhigga Balidogle waxaa ku sugan Taliska Mareykanka ee Afrika (US Africa Command) oo si dhow ula shaqeeya AUSSOM dhinacyada ammaanka Soomaaliya.

Marka laga reebo kaalmada ciidanka nabad-ilaalinta, Taliska Mareykanka ee Afrika ayaa sidoo kale tababaro iyo qalab siiya qaybta gaarka ah ee Ciidanka Xoogga Dalka Soomaaliyeed ee loo yaqaan Danab Special Forces. Lama oga ujeeddada rasmiga ah ee rakaabka diyaaradda markii ay joogeen Muqdisho.

GAROWE ONLINE